މިއަދު ކުރިއަށްދާ ލޯކަލް ކައުންސިލްގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި މިހާތަނަށް ލައްކައަކަށްވުރެ ގިނަ މީހުން ވޯޓު ލާފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.

އިންތިޚާބުގެ ވޯޓުލުން މިހާރު ކުރިއަށް ދާއިރު ވޯޓުލާން ނުކުންނަ މީހުންގެ ޢަދަދު ނިސްބަތުން ދަށް ކަމަށް އީސީން ވަނީ ބުނެފައެވެ. އީސީން ބުނީ މިއަދު މެންދުރުފަހު 13:50 އާ ހަމައަށް އިންތިޚާބުގައި ވޯޓުލާފައިވަނީ 100829 މީހުން ކަމަށެވެ. އިންތިޚާބުގައި ވޯޓު ލުމުގެ ޙައްޤު ލިބިފައިވަނީ 273128 މީހުންނަށެވެ.

Voting status@1350 hrs pic.twitter.com/hPp71GMr6y

— Ahmed Shareef (@ShareefRangondi) April 10, 2021

އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ ވޯޓުލާން މީހުން ނުކުންނަ ނިސްބަތަށް ބަލާއިރު ވޯޓުގެ ޖުމްލަ ޓާން އޯވަރ އުޅޭނީ 38 އާއި 40 އިންސައްތައާއި ދެމެދުގައި ކަމަށެވެ. ނަމަވެސް ފަހު ވަގުތު ވޯޓުލާން ގިނަ ބަޔަކު ނިކުމެއްޖެނަމަ މި ޢަދަދު އިތުރުވެދާނެ ކަމަށް ޝަރީފް ލަފާކުރެއްވިއެވެ.

މިއަދުގެ އިންތިހާބުގައި ލޯކަލް ކައުންސިލްތަކަށް 982 މެންބަރުން އަދި އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކަށް 930 މެންބަރުން އިންތިހާބު ކުރާނެ ކަމަށް އިލެކްޝަންސް ކޮމިޝަނުން ބުނެ އެވެ. އެއީ ޖުމްލަ 1912 މެންބަރުންނެވެ. އޭގެތެރޭގައި ހިމެނެނީ އަތޮޅު ކައުންސިލަރުންގެ ގޮތުގައި 18 މެންބަރުންނާއި ރަށު ކައުންސިލްތަކުގެ ރައީސުންގެ ގޮތުގައި 178 މެންބަރުންނާއި ރަށު ކައުންސިލްތަކުން އަންހެނުންނަށް ހާއްސަކުރި 370 ގޮނޑި އަދި ދެ ޖިންސަށް ހާއްސަ 370 ގޮނޑިއަށް މެންބަރުން އިންތިހާބު ކުރާގޮތަށް ވަނީ ހަމަޖެހިފައެވެ.