ކޮވިޑް ބަލީގައި ބޮޑުވަރުވާ މިންވަރު ކުޑަކޮށްދޭ، ބަލީގެ ފަރުވާއަށް ބޭނުންކުރެވޭ ބޭހެއް ފައިޒަރ ކުންފުނިން އުފައްދައިފިއެވެ.

ފައިޒަރ ކުންފުނިން ބުނީ މި ބޭހަކީ ކޮވިޑަށް ޕޮޒިޓިވް ވެފައިވާ، ދިފާއީ ނިޒާމުގެ ބާރުދަށް، އަދި ދުވަސްވީ މީހުން ބޭނުން ކުރުމަށް އެންމެ ރަނގަޅު ބޭސްކަމަށެވެ. އެގޮތުން މި ބޭސް ބޭނުން ކުރުމުން ބަލި ބޮޑުވެގެން ހޮސްޕިޓަލުގައި އެނދުމަތި ކުރަންޖެހޭ މިންވަރު 89 އިންސައްތައަށް ދަށްކޮށްދޭނެ ކަމަށް ވެސް އެ ކުންފުނިން ވަނީ ބުނެފައެވެ.

ފައިޒަރ ކުންފުނިން ބުނެފައިވާ ގޮތުގައި ކޮވިޑް ބަލީގައި ބޮޑުވަރުވާ މިންވަރު 89 އިންސައްތަ ދަށްކޮށްދޭ "ޕެކްސްލޮވިޑް" ބޭހަކީ އޭގެ ކްލިނިކަލް ޓަރައަލްތަކުން މި ބޭހުގެ ކާމިޔާބުކަން ޔަގީން ކުރެވިފައިވާ ބޭހެކެވެ. އަދި ހައި ރިސްކު، ނުވަތަ ބޮޑެތި ބަލިތަކަށް ފަރުވާ ކުރަމުންދާ މީހުންގެ ފަރާތުން ކޮވިޑް-19 ގެ އަލާމާތްތައް ފެންނަން ފެށުމުން ވީހާވެސް އަވަހަށް މި ބޭސް ބޭނުންކުރުން މުހިންމު ކަމަށް ކުންފުނިންބުނެއެވެ.

ފައިޒަރ ކުންފުނިން ބުނެފައިވަނީ، މި ބޭހުގެ އެންމެ ފުރަތަމަ ތަހުލީލުތައް ކާމިޔާބުވުމުން ބޭހުގެ ކުލިނިކަލް ޓްރައަލްތައް އިތުރަށް ކުރިޔަށް ގެންދިއުން ވަނީ މިހާރު ހުއްޓާލާފައެވެ.

ފައިޒަރއިން ޓެސްޓު ކޮށްފައިވާ ބޭހުން ކޮރޯނާ ވައިރަސް ހަށިގަޑުގެ ތެރޭގައި އިތުރުވުމަށް ބޭނުންވާ އެންޒައިމެއް ބްލޮކް ކޮށްދެއެވެ. އެގޮތުން، އެހެން އެންޓިވައިރަލް ގުޅަ ބޭހެއް ކަމުގައިވާ ރިޓޯނަވަޔަރާއިއެކު ބޭނުން ކުރުމުން، މިބޭހުގެ އަސަރު ހަށިގަނޑުގެ ތެރޭގައި ގިނަ ވަގުތު ދެމިހުންނަ ކަމަށް އެ ކުންފުނިން ބުނެއެވެ.

މިބޭސް ބޭނުން ކުރަންޖެހޭނީ 5 ދުވަހުގެ މުއްދަތަށް ކޮންމެ ދުވަހަކު 2 އިރު އިރަކު 3 ގުޅައެވެ.

ފައިޒަރއިން ބުނެފައިވާ ގޮތުގައި، އެކުންފުނިން މިހާރު ތައްޔާރު ވަމުންދަނީ، މި ބޭހުގެ ޓްރައަލްތަކުގެ ނަތީޖާތައް ބޭސް ބޭނުންކުރުމުގެ ހުއްދަ ދޫކުރާ އެމެރިކާގެ، އެފްޑީއޭއަށް ހުށަހެޅުމަށެވެ. އަދި މިހުއްދަ ހޯދުމަށް ހުށަހަޅަނީ ފާއިތުވެދިޔަ މަހު އެކުންފުންޏަށް ދޫކޮށްފައިވާ އެމަޖެންސީ ހުއްދައިގެ ދަށުންނެވެ.