އިދިކޮޅު ޕީޕީއެމުން އިއްޔެ މާލޭގައި ބޭއްވި "ނޭވާހޮޅިއަށް" އެއްވުމުގައި ގިނަ ބަޔަކު ހައްޔަރު ކުރީ ސަރުކާރު ވައްޓާލަފާނެތީ ބިރުންކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ ޕީއެންސީގެ މެންބަރު އާދަމް ޝަރީފް ވިދާޅުވެއްޖެއެވެ.

އާދަމް ޝަރީފް މިފަދައިން ވިދާޅުވީ، އެމްޑީޕީގެ އެތެރޭގެ އިންތިހާބުގައި ޗެއަރޕާސަންގެ މަގާމަށް ވާދަކުރައްވާ ފައްޔާޒަށް ނިސްބަތްކުރަށްވައި، ފައްޔާޒު ވަޒީރުކަމުގައި ހުންނެވުމަށް ދެން ބާކީ އޮތީ ދޮޅު އަހަރު ކަމަށް ވިދާޅުވެ ރައްޔިތުންގެ މަޖިލީހުގެ ނާއިބު ރައީސް އީވާ ޢަބްދުﷲ، ދެއްކެވި ވާހަކައާއި ގުޅިގެންނެވެ.

ސަރުކާރަށް ދެން އޮތީ ދޮޅު އަހަރުކަމަށް އިވާ ވިދާޅުވުމުން، އާދަމް ޝަރީފު މިއަދު ވިދާޅުވީ، އީވާ ވިދާޅުވި ފަދައިން ސަރުކާރު މި ދަނީ ނިމެން ކަމަށެވެ. އަދި އިއްޔެގެ އެއްވުމުގައި ގިނަ ބަޔަކު ހައްޔަރު ކުރީ ސަރުކާރު ބަލިކަށިވެފައި ވާތީއާއިއެކު ސަރުކާރު ވައްޓާލަފާނެތީ ބިރުން ކަމަށެވެ.

އާދަމް ޝަރީފު އިތުރަށް ވިދާޅުވީ، މިހާރަށްވުރެ ވެސް މިވެރިކަން ބަލިކަށިވާނެ ކަމަށާއި ގޮތް ނިންމަވާނީ ރައްޔިތުން ކަމަށެވެ. ގަބޫލު ކުރެވޭގޮތުގައި އާދަމް ޝަރީފް މިފަދައިން ވިދާޅުވީ, އީވާ އެ ވިދާޅުވީ 2023 ގެ އިންތިހާބު މި ސަރުކާރަށް ކާމިޔާބު ވާނެކަމުގެ ޔަގީންކަން ނެތް ވާހަކަ ކަމަށް މާނަ ކުރައްވާފައެވެ.

ޕީޕީއެމުން އިއްޔެވަނީ "ނޭވާހޮޅިއަށް" މިނަމުގައި އެއްވުމެއް ބާއްވާފައެވެ. މި އެއްވުމުގައި ޕީޕީއެމް/ޕީއެންސީގެ ލީޑަރޝިޕްގެ ބައެއް ބޭފުޅުންނާއި އާންމު ބައެއް މެންބަރުން ވެސް ވަނީ ހައްޔަރު ކޮށްފައެވެ.