ލަންކާގައިތިބި ދިވެހިންގެ ރައްކާތެރިކަން ކަށަވަރު ކޮށްދިނުމަށް އިދިކޮޅު ޕްރޮގްރެސިވް ކޯލިޝަނުން ދިވެހި ސަރުކާރަށް ގޮވާލައިފިއެވެ.

އަވަށްޓެރި ސްރީލަންކާ ރައްޔިތުންގެ މެދުގައި އުފެދިފައިވާ ނުތަނަވަސްކަމާއެކު، އެޤައުމުގެ ޙާލަތު ބަދަލުވެ، ހިނގަމުންދާ ހަމަނުޖެހުންތަކާއި މެދު ކަންބޮޑުވުން ފާޅުކޮށް އިދިކޮޅު ޕީޕީއެމުން މިއަދުވަނީ ބަޔާނެއް ނެރެފައެވެ. ޕީޕީއެމްގެ ބަޔާނުގައި ބުނެފައިވަނީ ސްރީލަންކާއަށް ކުރިމަތިވަމުންދާ ނުތަނަވަސް ކަމުން އަރައިގަތުމުގައި ޑިމޮކްރަސީގެ ރިވެތި އުސޫލުގެ ބޭނުންހިފާ، ޤައުމާއި ރައްޔިތުންނަށް ހަމަޖެހުން ލިބި ޤައުމުގެ ޙާލަތު ޢާންމު ޙާލަތަކަށް ބަދަލުވެގެން ދިއުމަކީ އެކޯލިޝަނާއި ދިވެހި އެންމެހާ ރައްޔިތުންގެ އުންމީދު ކަމަށެވެ.

އޭގެ އިތުރުން ލަންކާގައި ތިބި ދިވެހިންގެ ސަލާމަތާއި ރައްކާތެރިކަމާމެދު ކަންބޮޑުވާ ކަމަށާއި އެރައްޔިތުންގެ ޙާލަތު ގާތުން ރަނގަޅަށް ބެލުމަށްވެސް ޕީޕީއެމުންވަނީ ސަރުކާރަށް ގޮވާލާފައެވެ.

"ސްރީލަންކާއަށް ކުރިމަތިވެފައިވާ ނުތަނަވަސް ކަމުގެ ތެރެއިން އެޤައުމުގައި ދިރިއުޅޭ އެންމެހާ ދިވެހިންގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން އަޅަން ޖެހޭ އެންމެހާ ފިޔަވަޅުތައް އެޅުމަށާއި، ބޭނުންވާ އަސާސީ އަދި ޒަރޫރީ ޚިދުމަތްތައް ފަސޭހަކަމާއިއެކު ފޯރުކޮށްދެވޭނެ އިންތިޒާމުތައް ހަމަޖެއްސުމަށް ދިވެހި ސަރުކާރަށް ގޮވާލަމެވެ." ޕީޕީއެމްގެ ބަޔާނުގައިވެއެވެ.

ހަމައެއާއެކު، ލަންކާގައި ދިރިއުޅޭ އެންމެހާ ދިވެހިންގެ ހާލު ގާތުން ބަލާ، ބޭނުންވާ އެހީތެރިކަން ދެނެގަނެ، އެހީތެރިކަން ފޯރުކޮށްދިނުމުގެ އަވަސް ފިޔަވަޅުތަކެއް އެޅުމަށާއި، މީގެ އިތުރުންވެސް މިޙާލަތުގައި އެނބުރި ރާއްޖެ އަންނަން ބޭނުންވެފައި ތިބި ދިވެހި ރައްޔިތުންނަށް އެފަދަ އިންތިޒާމުތައް ފަސޭހަކަމާއެކު ހަމަޖައްސައިދިނުމަށް ވެސް ޕީޕީއެމުން ވަނީ ގޮވާލާފައެވެ.

"ބަދަލުވަމުންދާ ޙަލާތާއި ގުޅިގެން ކުރިމަތިވެދާނެ އެންމެހާ ނުރައްކާތަކުން ސަލާމަތްވެ ތިބުމަށް އެޤައުމުގައި ދިރިއުޅޭ އަދި ދަތުރު ކުރާ އެންމެހާ ދިވެހިންނަށް އިލްތިމާސްކުރަމެވެ." ޕީޕީއެމްގެ ބަޔާން ނިންމާލަމުން ބުނެފައިވެއެވެ.

ސްރީލަންކާއަށް ކުރިމަތިވެފައިވާ މާލީ މައްސަލަތަކާއި ގުޅިގެން އެޤައުމުގެ ސިޔާސީ މަސްރަޙް ހޫނުވެ، ޢާއްމުންގެ އުތުރިއެރުން ބޮޑުވުމާއެކު ބޮޑުވަޒީރުވެސް ވަނީ އިސްތިޢުފާ ދެއްވާފައެވެ. އަދި އެ ޤައުމުގައި މިހާރު ވަނީ ކާފިއުވެސް އިޢުލާނުކޮށްފައެވެ.