އިދިކޮޅު ޕީޕިއެމް/ޕީއެންސީން ކުރިޔަށް ގެންދާ "އިންޑިއާ އައުޓު" ހަރަކާތް ކާމިޔާބުވެ މިހާރު އިންޑިއާ މިލިޓަރީ އައުޓުވެ ނިމިފައިވާކަމަށް ޕީއެންސީގެ ނާއިބު ރައީސް އަދި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފު ވިދާޅުވެއްޖެއެވެ.

އިދިކޮޅު ކޯލިޝަނުން މިރޭ ބޭއްވި ޖަލްސާއެއްގައި ވާހަކަ ދައްކަވަމުން ޝަރީފް ވިދާޅުވީ އިންޑިޔާ އައުޓު ހަރަކާތަކީ މި ސަރުކާރުން އެންމެ ޖެހިލުންވާ ހަރަކާތް ކަމަށާއި، އެކަން ޕީޕީއެމްގެ ޓީމުން ކާމިޔާބުކޮށްފައިވާ ކަމަށެވެ. އަދި އިންޑިއާ މިލިޓަރީ އައުޓުވެ ނިމި އިންޑިއާ ސިފައިންގެ ކަންތައްތައް މިހާރު ނިމިއްޖެ ކަމަށާއި ދެން އޮތީ ކަހަންޖެހޭ ކުނިތައް ކެހުންކަމަށް ވެސް އާދަމް ޝަރީފުވަނީ ވިދާޅުވެފައެވެ.

އޭނާ ވިދާޅުވީ، މި ހަރަކާތް މިހާރުވެފައިވަނީ މުޅި ސަރުކާރުވެސް ސިހެމުންދާ ހަރަކާތަކަށް ކަމަށާއި މުޅި ގައުމުން އިންޑިޔާ މިލިޓަރީ ސިފައިން އެއްކޮށް ބޭލުމަށްފަހުގައި ނޫނީ މި ހަރަކާތް ނުހުއްޓާނެ ކަމަށެވެ.

"އިންޑިޔާ އައުޓު ވެއްޖެ މިހާރު. އިންޑިޔާ މިލިޓަރީ ސިފައިންގެ ކަންތައްތައް މިހާރު ނިމެނީ. ކަހަންޖެހޭ ކުއްޏެއް ކަހައި ސާފުކުރަންވީ ދެން. އިންޑިޔާ މިލްޓަރީ މިހާރުވަނީ އައުޓުވެފަ. ދެން އޮންނާނީ ރައްޔިތުން ބޭނުންވާ ތަރައްގީގެ ވެރިކަމެއް." ޝަރީފް ވިދާޅުވި އެވެ.

އިންޑިއާ އައުޓު ހަރަކާތުގައި އިސްކޮށް އުޅުއްވާ ހޯރަފުށީ ދާއިރާގެ ކުރީގެ މެންބަރު މުޙައްމަދު އިސްމާޢީލް ދެފަހަރަކަށް ފުލުހުން ހައްޔަރު ކޮށްފައިވާއިރު ދެވަނަ ފަހަރަށްވެސް ކޯޓުން އޭނާ ދޫކޮށްލާފައިވާތީ، އޭނާއަށްވެސް ޝަރީފުގެ ވާހަކައިގައި ވަނީ ވަރަށް ބޮޑަށް ތައުރީފު ކުރައްވާފައެވެ. އިންޑިއާ އައުޓު ހަރަކާތުގައި އިސްކޮށް އުޅުއްވާ މުޙައްމަދު އިސްމާޢީލަކީ ދަންޑެހެލެއްކަމަށް ޝަރީފު ވަނީ ވިދާޅުވެފައެވެ.

ރާއްޖޭގައި ތިބި އިންޑިއާ ސިފައިން އައުޓުވެ ނިމިއްޖެކަމަށް ވިދާޅުވިނަމަވެސް، އޭގެ ތަފުސީލެއް ޝަރީފު ހާމަ ކުރައްވާފައެއް ނުވެއެވެ.