އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އިން ބައިނަލްއަގްވާމީ ރިސާޗު ކޮންފަރެންސެއް ބާއްވަން ހަމަޖައްސައިފިއެވެ.

"އިންޓަނޭޝަނަލް ކޮންފަރެންސް އޮން އިންޓަލެކްޗުއަލް އެޑްވާންސްމަންޓް" (އައިސީއައިއޭ) ނަމުގައި ބާއްވާ މި ކޮންފަރެންސް އޮންނާނީ މި މަހުގެ 17 އާއި 18 ވަނަ ދުވަހު އެ ޔުނިވާސިޓީގައެވެ.



2016 ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ މި ކޮންފަރެންސް ކޮވިޑުގެ ސަބަބުން މިދިޔަ ދެ އަހަރު ބޭއްވީ ހައިބްރިޑްކޮށެވެ. މި ކޮންފަރެންސްގެ މަގުސަދަކީ އިލްމު ހިއްސާކޮށް އުނގެނުމަށް ލޯބިކުރާ މުޖުތަމައެއް ބިނާކުރުންކަމަށް އައިޔޫއެމްއިން ބުނެއެވެ.

މި އަހަރުގެ ކޮންފަރެންސްގައި ބައިވެރިވާ ބޭފުޅުންގެ ތެރޭގައި މެލޭޝިއާގެ އިސްލާމިކް ޔުނިވާސިޓީގެ ކުރީގެ ރައީސް އަދި މެލޭޝިއާގެ ސެންޓްރަލް ބޭންކުގެ ޝަރީއާ އެޑްވައިޒަރީ ކައުންސިލްގެ މިހާރު ޗެއާމަން ޕްރޮފެސަރު ޑރ. މުހައްމަދު ދާއޫދު ބަކަރް ހިމެނިވަޑައިގަންނަވައެވެ. މީގެ އިތުރުން ޔަމަނުގެ ސަންޢާގެ ޔުނިވާސިޓީ އޮފް ސައިންސް އެންޑް ޓެކްނޮލޮޖީގެ މުއައްސިސް އަދި ކުރީގެ ރައީސް ޕްރޮފެސަރު ޑރ. ދާވޫދު އަބްދުލްމަލިކާއި ޕާކިސްތާނުގެ އިންޓަނޭޝަނަލް އިސްލާމިކް ޔުނިވާސިޓީގެ އިސްލާމިކް ރިސާޗް އިންސްޓިޓިއުޓްގެ ޑިރެކްޓަރު ޖެނެރަލް ޕްރޮފެސަރު ޑރ. މުހައްމަދު ޒިއާއުލް ހައްގު ވެސް މި ކޮންފަރެންސްގައި ބައިވެރިވެވަޑައިގަންނަވާނެއެވެ.

ކޮންފަރެންސްގައި ރިސާޗު ޕޭޕަރުތައް ހުށަހަޅާނީ މައިގަނޑު ހަތަރު ތީމެއްގެ މައްޗަށެވެ. އެއީ ސޯޝަލް ސައިސަންސް، ހިއުމޭނިޓީސް އަދި އެޑިއުކޭޝަން، ޓޫރިޒަމް، ތިމާވެށި އަދި ޓެކްނޮލޮޖީ ގުރުއާނިކް ސްޓަޑީސް، ޝަރީއާ އެންޑް ލޯ، މެނޭޖްމަންޓް، ވިޔަފާރި، އިގްތިސާދު، އެކައުންޓިން، ފައިނޭންސް އަދި ބޭންކިންއެވެ.



މީގެ އިތުރުން މި ކޮންފަރެންސްގައި ކޮވިޑާ ގުޅޭ ގޮތުން އެކި ދާއިރާތަކުން ކަރުދާސްތައްވެސް ހުށަހަޅާނެއެވެ.