ގޭންގުތަކާއި މަސްތުވާތަކެއްޗާ ދެކޮޅަށް ކުރާމަސައްކަތުގައި ފަސްޖެހުމެއް ނެތްކަމަށް ޕޮލިސް ކޮމިޝަނަރ މުޙައްމަދު ޙަމީދު ވިދާޅުވެއްޖެއެވެ.

މިއަދު ހެނދުނު މާލޭގައި އޮފްޑިއުޓީގައި ތިބި ތިން ފުލުހަކަށް ޙަމަލާދީ ޒަޚަމްކޮށްލި ޙާދިސާއާ ގުޅިގެން ސީޕީ ޙަމީދު މިއަދު ވިދާޅުވީ އެކަން ކޮށްފައިވަނީ ހެންވޭރުގައި އޮންނަ ގްރޫޕަކަށް ނިސްބަތްވާ ބަޔަކު ކަމަށެވެ. އަދި އެ މައްސަލާގައި ޝާމިލުވާ އެންމެން ހައްޔަރު ކުރާނެ ކަމުގެ އިންޒާރު ސީޕީ ޙަމީދު ވަނީ ދެއްވާފައެވެ.

ސީޕީ ވިދާޅުވީ އެކަމާގުޅިގެން އަވަސް ފިޔަވަޅުތަކެއް އެޅުމަށް އަންގަވާފައިވާނެ ކަމަށެވެ. އަދި ފުލުހުންގެ އޮފިސަރުންނަށް ކުރާ އަނިޔާތައް ވަރަށް ސީރިއަސްކޮށް ބައްލަވާނެ ކަމަށްވެސް ސީޕީ ވިދާޅުވިއެވެ.

"ގޭންގްތަކާއި މަސްތުވާތަކެއްޗާ ދެކޮޅަށް ކުރަމުންދާ މަސައްކަތުގައި ދިވެހި ފުލުހުންގެ ސަފުތައް ފަހަތަށް ނުޖެހޭނެ." ސީޕީ ވިދާޅުވެފައިވެއެވެ.

The wider systems need to step up efforts to holistically tackle the problems of violent crime groups and the trafficking of narcotic drugs. More support is needed to protect police officers, for us to be able to protect lives of people and serve communities.

— Mohamed Hameed (@M_Hameedh) September 9, 2022

ސީޕީ ޙަމީދު މިމޭރުމުން ވިދާޅުވެފައިވާއިރު ފުލުހުން މިއަދު ބުނީ 3 ފުލުހަކަށް ޙަމަލާދިންކަމުގެ ތުހުމަތުގައި މިއަދު ހެނދުނު 11:50 ހާއިރު 2 މީހަކު ހައްޔަރުކޮށްފައިވާ ކަމަށެވެ. އަދި އަނިޔާވި ފުލުހުންނަށް މިހާރު އޭޑީކޭގައި ފަރުވާދެމުން އަންނަ ކަމަށް ފުލުހުން މަޢުލޫމާތުދެއެވެ.

ފުލުހުން ބުނީ ތިން ފުލުހުންނަށް ވެސް އެކިވަރުގެ އަނިޔާތައް ވެފައިވާ ކަމަށެވެ. ނަމަވެސް އަނިޔާތަކުގެ ތަފްސީލް ޙިއްސާކޮށްފައެއް ނުވެއެވެ.