ރާއްޖޭގައި ޕްރައިވެޓް ޔުނިވަރސިޓީތަކަށް ފުރުސަތު ނެތްކަމަށް ނިންމީ އެމްޑީޕީގެ ސުޕަމެޖޯރިޓީން ކަމަށް ޕްރައިވެޓް ހަޔަރ އެޑިއުކޭޝަން އެސޯސިއޭޝަންގެ ކުރީގެ ރައީސް އަހުމަދު ޝަރީފު ވިދާޅުވެއްޖެއެވެ.

ޝަރީފް މިފަދަ މޭރުމަކުން ވާހަކަ ދައްކަވާފައިމިވަނީ ދިވެހިރާއްޖޭގެ ގައުމީ ޔުނިވަސިޓީގެ ފަހި ކުތުބުހާނާ ރޭ ހުޅުވުމާގުޅިގެން ކުރެއްވި ޓްވީޓެއްގައެވެ.

ސައިރިކްސް ކޮލެޖްގެ ވެރިޔާ އަހުމަދު ޝަރީފް ވިދާޅުވީ، ޕްރައިވެޓް ހަޔަރ އެޑިއުކޭޝަން އެސޯސިއޭޝަންގެ މެންބަރެއްގެ ޙައިސިއްޔަތުންނާއި، 29 އަހަރުވަންދެން ރާއްޖޭގައި ހަޔަރ އެޑިއުކޭޝަން އިންސްޓިޓިއުޝަނެއް ހިންގި ވެރިއެއްގެ ހައިސިއްޔަތުން ޕްރައިވެޓް ޔުނިވަރސިޓީތަކަށް ފުރުސަތު ނެތްކަމަށް އެމްޑީޕީން ނިންމާފައިވާ ނިންމުން ކުށްވެރިކުރަށްވާ ކަމަށެވެ.

މަތީ ތައުލީމާބެހޭ ޤާނޫނުގައި ޕްރައިވެޓް ޔުނިވަރސިޓީއެއް އުފެއްދޭނީ ކޮލެޖް ހިންގަން ފަށާތާ 20 އަހަރު ފަހުންކަމަށް ވަނީ ކަނޑައަޅާފައެވެ. ޝަރީފް ވިދާޅުވީ އެޤާނޫނުގައި ޕްރައިވެޓް ސެކްޓަރަށް ވަނީ ފުރުސަތުތައް ހަނިކޮށްފައިކަމަށެވެ.

މަތީ ތަޢުލީމީ ދާއިރާގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ އަދި މިހާރުވެސް އެމަސައްކަތުގައި ދެމިހުންނެވި ޝަރީފު މީގެ ކުރިންވެސް ވަނީ ތަޢުލީމީ ފަންނުގެ ޤާނޫނުގައި ޕްރައިވެޓް އިންސްޓިޓިއުޝަންސްތަކަށް އޮތް ފުރުސަތު ހަނިކޮށްފައިވާ ކަމަށް ވިދާޅުވެ އެކަމުގެ ކަންބޮޑުވުން ފާޅުކުރަށްވާފައެވެ. އެގޮތުން އަމިއްލަ ޔުނިވާސިޓީތައް ހެދުމުގެ ފުރުސަތު، ކޮލެޖުތަކަށް ދީފައިވާ ގޮތާމެދު ޝަރީފް ކަންބޮޑުވުން ފާޅުކުރަށްވާފައިވެއެވެ.