އިސްލާމިކް މިނިސްޓްރީގެ ކުރީގެ ޕާމަނަންޓް ސެކްރެޓަރީ މުޞްޢަބު ޢަބްދުﷲ އަށް 1 މިލިއަން ރުފިޔާއަށްވުރެ ބޮޑު ޢަދަދެއްގެ ބަދަލެއް ދިނުމަށް ހައިކޯޓުން ކުރިޙުކުމް ސްޕްރީމްކޯޓުގައި އިސްތިއުނާފުކުރަން ސިވިލް ސަރވިސް ކޮމިޝަނުން ނިންމައިފިއެވެ.

އިސްލާމިކް މިނިސްޓްރީގެ ޕީއެސްގެ މަގާމަށް 25 ޖުލައި 2017ގައި އައްޔަން ކުރި މުސްޢަބު ސަސްޕެންޑު ކުރީ މެއި 2019ގައެވެ. މުސްޢަބް ވަޒީފާ އިން ސަސްޕެންޑް ކުރީ އިސްލާމިކް މިނިސްޓްރީގެ ސިއްރު ލިޔުމެއް ޓްވިޓާ މެދުވެރިކޮށް ލީކު ކުރި ކަމަށް ބުނެ އެވެ. އެއީ މުސްޢަބާއި އިތުރު މީހަކު ގުޅިގެން އެ މިނިސްޓްރީގެ ފައިސާއަށް ހިޔާނާތްތެރިވި ކަމަށް ބުނާ މައްސަލައެއް އޭސީސީން ތަހުގީގުކޮށް މިނިސްޓްރީއަށް އޭސީސީން މައްސަލަ ނިންމައި ފޮނުވި ސިޓީއެކެވެ.

ގިނަ ދުވަސްތަކެއްވަންދެން ސަސްޕެންޝަނުގައި ބެހެއްޓުމަށްފަހު، މުޞްޢަބު މަޤާމުން ވަކިކުރީ 2019 ސެޕްޓެމްބަރު މަހުގައެވެ. އެ މައްސަލާގައި ވަޒީފާ އިއާދަކުރުމާ ހަމައަށް ލިބެންޖެހޭ މުސާރައާއި އިނާޔަތްތައް ހޯދަން ސިވިލް ކޯޓުގައި މުސްޢަބު ދަޢުވާކުރުމުން 2020 ވަނަ އަހަރު ސިިވިލް ކޯޓުން ޙުކުމްކުރީ މުޞްޢަބު މަޤާމުން ވަކިކުރީ ޤާނޫނާ ޚިލާފަށްކަމަށް ސާބިތުނުވާ ކަމަށެވެ.

އެހެންނަމަވެސް މުސްޢަބުގެ ފަރާތުން އެ މައްސަލަ ހައިކޯޓުގައި އިސްތިއުނާފުކުރުމުން އެ ކޯޓުން މިދިޔަ މަހުގެ 28 ވަނަ ދުވަހު ކުރި ޙުކުމުގައި ބުނެފައިވަނީ މުޞްޢަބު މަޤާމުން ވަކިކުރީ ޤާނޫނާ ޚިލާފަށްކަމަށް ސާބިތުވާ ކަމަށެވެ. އެހެންކަމުން މުޞްޢަބު މަޤާމުން ވަކިކުރުމަށްފަހު އެ މަޤާމަށް އެހެން މީހަކު އައްޔަންކޮށްފައިވާތީ ހޯދައިދެވެންއޮތް ހައްލަކީ ބަދަލު ނަގައިދިނުން އެކަނި ކަމަށާއި، ބަދަލުގެ ގޮތުގައި 1.18 މިލިއަން ރުފިޔާ ދިނުމަށް ޙުކުމްކުރާ ކަމަށް ހައިކޯޓުން ނިންމަވާފައިވެއެވެ.

އެކަމާގުޅިގެން ސިވިލް ސާވިސް ކޮމިޝަނުން ބުނެފައިވަނީ، އެ މައްސަލައިގައި ހައި ކޯޓުން ކުރި ހުކުމް ސުޕްރީމް ކޯޓުގައި އިލްތިމާސް ކުރަން އެ ކޮމިޝަނުން ނިންމާފައިވާ ކަމަށެވެ. އަދި މިހާރު ކުރިއަށްދަނީ ހޯދަންޖެހޭ ރިޕޯޓުތައް ހޯދައި, ޤާނޫނީ ގޮތުން ފުރިހަމަ ކުރަންޖެހޭ ކަންކަން ފުރިހަމަކުރުމުގެ މަސައްކަތް ކަމަށާއި، ވަރަށް އަވަހަށް މައްސަލަ އިލްތިމާސް ކުރަން ސުޕްރީމް ކޯޓަށް ހުށަހަޅާނެ ކަމަށް ސީއެސްސީން ވަނީ ބުނެފައެވެ.