ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރު އަލްއުސްތާޛާ އައިޝަތު އާޒިމާ ޝަކޫރުގެ މައްޗަށް ކުރާ ދެ ދައުވާ މަދަނީ މިންގަނޑުން ކުރިއަށް ގެންދިއުމަށް ކްރިމިނަލް ކޯޓުން ނިންމާފައިވާ ނިންމުން ދަމަހައްޓައި މައްސަލައިގެ ޝަރީޢަތް ފަށައިފިއެވެ.

މި މައްސަލާގައި އާޒިމާ ވިދާޅުވެފައިވަނީ އެމްއެމްޕީއާރުސީގެ ޚިޔާނާތުގެ މައްސަލާގައި އޭނާއަށް ދަޢުވާ އުފުލާފައިވަނީ ފުރިހަމަނުވާ ތަހުޤީގެއްގެ މައްޗަށް ބިނާކޮށް ކަމަށެވެ. މިއީ އެއްވެސް ހެއްކެއް ޤަރީނާއެއް ނެތި ކޮށްފައިވާ ދައުވާއެއްކަން އާޒިމާ ފާހަގަކުރަށްވާފައިވެއެވެ. އޭގެ އިތުރުން ދައުލަތުން އިއްވާފައިވާ ދެ ދައުވާއަށްވެސް އާޒިމާ ވަނީ އިންކާރު ކުރަށްވާފައެވެ.

އާޒިމާގެ މައްޗަށް ކުރާ ދައުވާތައް މަދަނީ މިންގަނޑުން ކުރިއަށް ގެންދެވޭނެކަމަށް ކްރިމިނަލް ކޯޓުން ކަނޑައެޅުމުން އެ ނިންމުންތައް ބާތިލުކުރުމަށް މަތީ މަރުޙަލާގެ ކޯޓުތަކުގައި އާޒިމާގެ ފަރާތުން އިސްތިޢުނާފް ކުރަށްވާފައިވެއެވެ. ނަމަވެސް ސުޕްރީމް ކޯޓުން ނިންމަވާފައިވަނީ ޝަރީއަތް ކުރިއަށް ގެންދެވޭނެ ކަމަށް ކަނޑައަޅައި ކޯޓުން ނިންމާ ނިންމުމަކީ އިސްތިއުނާފު ކުރެވޭނެ ބާވަތުގެ ނިންމެވުންތަކެއް ނޫން ކަމަށެވެ.

އާޒިމާ ޝަކޫރުގެ މައްޗަށް އުފުލާފައިވާ ދެ ދައުވާގައި މިއަދު ބޭއްވި އަޑުއެހުމުގައި އާޒިމާ އެދިވަޑައިގެންފައިވަނީ އޭނާގެ މައްޗަށް އުފުލި ދައުވާގެ ޝަރީޢަތަކީ މަދަނީ މިންގަނޑުން ކުރިއަށްގެންދެވޭނެ ޝަރީޢަތެއް ކަމަށް ކްރިމިނަލް ކޯޓުން ނިންމާފައިވާ ނިންމުން މުރާޖައާކޮށްދިނުމަށެވެ. އެގޮތުން އާޒިމާގެ ފަރާތުން ފާހަގަކުރެއްވީ ރައީސް ޔާމީނަށް މަނީލޯންޑަރ ކުރުމުގައި އާޒިމާ މަގުފަހިކޮށްދެއްވިކަމަށް ދައުލަތުން ތުހުމަތުކުރި ނަމަވެސް، ރައީސް ޔާމީނުގެ މައްޗަށް މަނީ ލޯންޑަރިންގެ ކުށާއި އަމަލު ސާބިތުނުވާކަމަށް ސުޕްރީމް ކޯޓުން ނިންމާފައިވާ ކަމަށެވެ.

އެކަމަށް ރައްދުދެމުން ދައުލަތުން ބުނީ ޤާނޫނުލްއުޤޫބާތުގެ 30 ވަނަ މާއްދާގައި ކުށްކުރި މީހާގެ މައްޗަށް ކުށް ސާބިތުނުވާ ޙާލަތުގައިވެސް، ކުށުގެ ބައިވެރިއަކަށް ނުވަތަ އެހީތެރިއަކަށް ދައުވާ ކުރެވިދާނެކަން ބަޔާންކޮށްފައިވާކަމަށެވެ.

މިކަމުގައި މައްސަލަ ބައްލަވާ ޤާޟީ އަލީ އާދަމް ވިދާޅުވެފައިވަނީ އާޒިމާގެ މައްސަލައަކީ މަދަނީ މިންގަނޑުން ކުރިއަށްގެންދެވޭނެ މައްސަލައެއްކަމަށް ނިންމެވި ނިންމެވުން މުރާޖައާކޮށް ބަދަލުކުރަންޖެހޭ ޤާނޫނީ ސަބަބެއް އާޒިމާއަށް ނުދެއްކެވޭ ކަމަށެވެ.

އާޒިމާގެ މައްޗަށް ދަޢުލަތުން އުފުލާފައިވަނީ ގއ. ވޮޑަމުލާ މައްސަލާގައި ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާ އާއި މަނީ ލޯންޑަރިނަށް މަގުފަހިކޮށް ދިނުމުގެ ދައުވާއެވެ. އާޒިމާގެ މައްޗަށް ދޮގު މައުލޫމާތު ދިނުމުގެ ދައުވާ ކުރަނީ ވެރިކަމުގައި ހުންނަވައިގެން މަނީލޯންޑަރ ކުރެއްވި ކަމުގެ ކުށް ދަށުކޯޓާއި ހައިކޯޓުގައި ސާބިތުވި ކުރީގެ ރައީސް ޢަބްދުالله ޔާމީންގެ އެކައުންޓަށް ޖަމާވި އެއްމިލިއަން ޑޮލަރު އެސްކްރޯ އެކައުންޓަށް ޖަމާކުރި މައްސަލައިގައި އެންޓި ކޮރަޕްޝަން ކޮމިޝަނަށް އާޒިމާ ދޮގު މައުލޫމާތު ދެއްވާފައިވާ ކަމަށް ބުނާ މައްސަލައިގައެވެ.

އަދި މަނީ ލޯންޑްރިންއަށް މަގުފަހިކޮށްދިނުމުގެ ދައުވާ ކުރަނީ އެ ފައިސާ އެސްކްރޯ އެކައުންޓަށް ޖަމާނުކޮށް، އިންވެސްޓްމަންޓް އެކައުންޓަކަށް ބަދަލުކުރުމުގައި ބޭންކުން ލިޔުމެއް ހޯދުމުގައި އާޒިމާ މަސައްކަތް ކުރަށްވައި، އެ ފައިސާ އަސްލު އޮޅުވާލަން މަސައްކަތް ކުރެއްވި ކަމަށް ތުހުމަތުކޮށެވެ. އާޒިމާގެ މައްޗަށް މި ދައުވާތައް އުފުލާފައިވަނީ 2019 ވަނަ އަހަރުގެ ފެބްރުއަރީ މަހުގެ 17 ވަނަ ދުވަހު އެވެ.

މަނީ ލޯންޑަރިންނާއި ޓެރަރިޒަމް ފައިނޭންސް ކުރުން ހުއްޓުވުމުގެ ގާނޫނުގެ ދަށުން އާޒިމާގެ މައްޗަށް، މަނީ ލޯންޑަރ ކުރުމަށް މަގުފަހިކޮށްދިނުމުގެ ދައުވާ އުފުލާފައިވާ އިރު އެ މައްސަލަ ސާބިތުވެއްޖެ ނަމަ 50،000 ރުފިޔާ އާއި 500،000 ރުފިޔާއާ ދެމެދުގެ އަދަދަކުން އޭނާ ޖޫރިމަނާކުރާާނެއެވެ. ނުވަތަ ދެ އަހަރާއި 10 އަހަރާއި ދެމެދުގެ ޖަލު ހުކުމެއް އިއްވާނެއެވެ.

ގާނޫނުލް އުގޫބާތުގެ 521 ވަނަ މާއްދާގެ ދަށުން ރަސްމީ އިދާރާއަކަށް ދޮގު މައުލުމާތު ދިނުމުގެ ދައުވާ އާޒިމާގެ މައްޗަށް އުފުލާފައިވާ އިރު އެ މައްސަލައިގައި އަދަބު ކަނޑައެޅުމުގެ އަސާސީ މިންގަނޑަކީ ހަތަރު މަހާއި 24 ދުވަހެވެ. އެ މައްސަލަ ސާބިތުވެއްޖެ ނަމަ އަންނާނެ އެންމެ ބޮޑު އަދަބަކީ އެއް އަހަރު ދުވަހުގެ ޖަލު ހުކުމެކެވެ.