ފުލުހުންނަށް ހަމަލާދިނުމުން ހައްޔަރުކުރި މީހާގެ ބަންދަށް 5 ދުވަސް ކްރިމިނަލް ކޯޓުން ދީފިއެވެ.

ފުލުހުން އިއްޔެ ބުނީ މާލޭގައި 3 ފުލުހަކަށް ޙަމަލާދީ ޒަޚަމްކޮށްލި މައްސަލައާ ގުޅިގެން 20 އަހަރުގެ މީހަކު ހައްޔަރުކޮށްފައިވާ ކަމަށެވެ. އޭނާގެ ބަންދު މުއްދަތު މަޖިލީހަށް ކްރިމިނަލް ކޯޓަށް ޙާޟިރުކުރުމުން ކޯޓުން އޭނާގެ ބަންދަށް ދީފައިވަނީ ފަސް ދުވަހެވެ.

މިމައްސަލާގައި މީގެކުރިން ހައްޔަރުކޮށްފައިވަނީ 18 އަހަރާއި 20 އަހަރުގެ 2 ޒުވާނުންނެވެ. އެމީހުންގެ ބަންދާއިމެދު ގޮތެއް ނިންމުމަށް ކޯޓަށް ގެންދިއުމުން ޝަރީއަތް ނިމެންދެން ބަންދުކުރުމަށް ކޯޓުން ވަނީ އަމުރުކޮށްފައެވެ.

ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ ފުލުހުންނަށް ހަމަލާދީފައިވަނީ ހެންވޭރުގައި އޮންނަ ގްރޫޕަކަށް ނިސްބަތްވާ ބަޔަކު ކަމަށެވެ. އަދި އެ މައްސަލާގައި ޝާމިލުވާ އެންމެން ހައްޔަރު ކުރާނެ ކަމުގެ އިންޒާރު ސީޕީ ޙަމީދު ވަނީ ދެއްވާފައެވެ.

ސީޕީ ވިދާޅުވީ އެކަމާގުޅިގެން އަވަސް ފިޔަވަޅުތަކެއް އެޅުމަށް އަންގަވާފައިވާނެ ކަމަށެވެ. އަދި ފުލުހުންގެ އޮފިސަރުންނަށް ކުރާ އަނިޔާތައް ވަރަށް ސީރިއަސްކޮށް ބައްލަވާނެ ކަމަށްވެސް ސީޕީ ވިދާޅުވިއެވެ.