ހދ. ނޮޅިވަރަންފަރު ނެރުމައްޗަށް ސެޕްޓެންބަރު 8 ވަނަ ދުވަހު އެރި "ސަވާރީ" ބޯޓު ފުންކޮށްފިއެވެ.

އެމްއެންޑީއެފުން މިއަދު ބުނީ ހއ. ކެލާ "ސަވާރީ" ބޯޓުގެ ގެ މުދާތަކާއި ބައިތައް ސެލްވޭޖު ކުރުމުގައި އެމްއެންޑީއެފް ކޯސްޓްގާޑު ފަސްޓް ސްކޮޑްރަންގެ ސެއިލަރުންނާއި ޑައިވަރުންގެ އިތުރުން، ކޯސްޓްގާޑު ޝިޕް ޝަހީދު ޢަލީގެ އޮފިސަރުންނާއި ސިފައިން އެހީތެރިކަން ފޯރުކޮށްދީފައިވާ ކަމަށެވެ.

"ފަސް ދުވަހުގެ މުއްދަތަކަށް ދެމިގެންދިޔަ މި އޮޕަރޭޝަނުގައި ކޯސްޓްގާޑުގެ ޑައިވަރުން ވަނީ އެ ސަރަހައްދުގައި އެތަކެއް ޑައިވް އޮޕަރޭޝަންތަކެއް ކުރިއަށްގެންގޮސްފައެވެ. ހަމައެއާއެކު، ކޯސްޓްގާޑު ޝިޕް ޝަހީދުޢަލީގެ ސިފައިންނާއި ކޯސްޓްގާޑު ފަސްޓް ސްކޮޑްރަންގެ ސެއިލަރުން ވަނީ މި މަސައްކަތުގައި ހަރަކާތްތެރިވި ނޮޅިވަރަންފަރު ކައުންސިލަށާއި އެ ރަށުގެ ރައްޔިތުންނަށް އެހީތެރިކަން ފޯރުކޮށްދީފައެވެ." އެމްއެންޑީއެފުން ބުނެފައިވެއެވެ.

އެމްއެންޑީއެފުން ބުނީ މި އޮޕަރޭޝަނުގައި، އެ ދޯނީގެ މައިގަނޑު ބައިތައް ކަމުގައިވާ އިންޖީނާއި، ޝާފްޓާއި، ޖެނެރޭޓަރާއި، ދޯނީގެ ހަލްގެ ބޮޑުބައި ވަނީ އެއްގަމަށް ގެނެސްފައިކަމަށެވެ. މީގެއިތުރުން، އެ ސަރަހައްދަށް ބޭރުވި ދޯނީގެ ގިނަ ބައިތަކާއި މުދާތައް ވަނީ އެ ސަރަހައްދުން ސާފު ކުރެވި، އެއްގަމަށް ގެނެސްފައިކަމަށް އެމްއެންޑީއެފުން މަޢުލޫމާތުދެއެވެ.

އެމްއެންޑީއެފް ކޯސްޓްގާޑުން ހިންގި މި އޮޕަރޭޝަން ނިންމާލާފައިވަނީ 2022 ސެޕްޓެންބަރު 13 ވަނަ ދުވަހުއެވެ.