ކުރެވުނު ކުށަށް ތައުބާވެ ރައްޔިތުން ކިބައިން މާފަށް އެދޭ ކަމަށް އެއްޖިންސުން ބަދުއަޚުލާޤީ ޢަމަލު ހިންގިކަމަށް އިޢުތިރާފް ވެފައިވާ ޤާނޫނީ ވަކީލު އަޙްމަދު ނާޒިމް އަބްދުއް ސައްތާރު ބުނެފިއެވެ.

ނާޒިމަށް ޙުކުމް ކުރުމަށް މިއަދު ހަވީރު 16:30ގައި ޝަރީއަތް ބޭއްވުމަށް ހަމަޖެހިފައިވަނިކޮށް އޭނާ މީޑިއާތަކަށް ފޮނުވި ބަޔާނެއްގައި ބުނެފައިވަނީ، ޕްރޮސިކިއުޓަރ ޖެނެރަލްގެ ފަރާތުން އޭނާގެ މައްޗަށް ދަޢުވާކޮށްފައިވަނީ ޤާނޫނުލްއުޤޫބާތުގެ 411 ވަނަ މާއްދާގެ (ހ) ގެ 2ވަނަ މާއްދާއާ ޙަވާލާދީ އެ މާއްދާގެ (ށ) ގެ (1) ވަނަ ނަންބަރުގެ ދަށުން، އެއްޖިންސުން ޖިންސީގުޅުން ހިންގުމުގެ ކުށަށް ކަމަށެވެ.

މީގެ ކުރިން ޝަރީޢަތުގެ މަޖިލީހުގައިވެސް ނާޒިމް ވަނީ އޭނާގެ މައްޗަށް އުފުލާފައިވާ އެއްޖިންސުން ޖިންސީގުޅުން ހިންގުމުގެ ދަޢުވާއަށް އިއުތިރާފުވާކަމަށް ބުނެފައެވެ. މިމަހުގެ 11 ވަނަ ދުވަހު ބޭއްވި އަޑުއެހުމުގައި ނާޒިމް ބުނެފައިވަނީ، އަލަމްގީރާއިއެކު ގުޅުން ހިންގި ނަމަވެސް، ލިވާތު ނުކުރާ ކަމަށެވެ.

"އަޅުގަނޑު ކުރި ކުށަށް، އަޅުގަނޑު ތަޢުބާވެ، ހިތާމަކުރަމެވެ. އަޅުގަނޑު އެދެނީ މިކުށަށް އިޢުތިރާފުވެ، ތަޢުބާވެ، ރައްޔިތުންގެ އަރިހުން މާފެވެ." ނާޒިމްގެ ބަޔާނުގައިވެއެވެ.

ނާޒިމްގެ ބަޔާނުގައި ބުނެފައިވަނީ އޭނާ ކުށަށް އިޢުތިރާފު ވަނީ މިކަމުގައި ކުށްވެރިއަކަށްވުމުގެ އިތުރުން، މިކަމުގައި ބްލެކްމެއިލްކޮށް ފައިސާ އަތުލަންއުޅެ، އެމައްސަލައިގައި ވިކްޓިމެއް ކަމުގައި ވުމާވެސް އެކު ކަމަށެވެ.

"އަދި އަޅުގަނޑު ރާއްޖޭން ބޭރަށް ފިލައިގެން ނުގޮސް، ރާއްޖޭގައި ހުރެ، އަޅުގަނޑު އިޢުތިރާފުވެ، މި ކުށުގެ އަދަބަށް ކުރިމަތިލާން ބޭނުންވާތީވެއެވެ." ނާޒިމްގެ ބަޔާނުގައިވެއެވެ.

އެއްޖިންސުން ގުޅުން ހިންގި ކަމުގެ ތުހުމަތުގައި ނާޒިމް ހައްޔަރު ކުރީ ޖުލައި މަހުގެ 28 ވަނަ ދުވަހުއެވެ. ނަމަވެސް ހައްޔަރު ކޮށްފައި ބަހައްޓަންޖެހޭ ސަބަބެއް ނެތްކަމަށް ބުނެ މިދިޔަ މަހު 12 ވަނަ ދުވަހު އޭނާ ވަނީ ދޫކޮށްލާފައެވެ.

މި މައްސަލާގައި ހިމެނޭ އަލަމްގީރު ވެސް އޭނާގެ މައްޗަށް އިއްވި ތިން ދައުވާއަށް އިއުތިރާފްވުމާއި ގުޅިގެން ހަތް މަހާއި ހަ ދުވަހަށް ޖަލަށްލާން ކްރިމިނަލް ކޯޓުން ވަނީ ހުކުމް ކޮށްފަ އެވެ.

މި މައްސަލާގައި ހިމެނޭ މީހުންނަށް ދައުވާކޮށްފައިވަނީ ގާނޫނުލްއުގޫބާތުގެ ދަށުންނެވެ. އަލަމްގީރާއެކު އެއްޖިންސުން ގުޅުން ހިންގި މައްސަލާގައި ނާޒިމްގެ އިތުރުން ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު އަދި ފުލުސް އޮފިސަރެއްގެ ގޮތުގައި އޭރު ހުރި އަބްދުއްރަހުމާން ރަފީއުގެ މައްޗަށް ވެސް ވަނީ އެއްޖިންސުން ގުޅުން ހިންގުމުގެ ދައުވާ ދައުލަތުން އުފުލާފައެވެ.

މި މީހުންގެ އިތުރުން ވެސް ގިނަ އަދަދެއްގެ ބަޔަކު އަލަމްގީރާއެކު އެއްޖިންސުން ގުޅުން ހިންގުމުގެ ތުހުމަތުގައި ހައްޔަރުކޮށް އެމައްސަލަތައް ފުލުހުން ދަނީ ބަލަމުންނެެވެ.