އިއްޔެގެ ވަގުތެއްގައި މާފުށި ޖަލުގައި މަރުވި މ. މުލި، ހުދުފިނިފެންމާގޭ މުޙައްމަދު ނަޝީދުގެ މަރާއި ގުޅޭ ފުރިހަމަ ތަހްގީގެއް ހިންގައި އެހާދިސާގެ ހަގީގަތް ހާމަކޮށްދިނުމަށް ހިއުމަން ރައިޓްސް ކޮމިޝަނާއި ކަމާބެހޭ އެނޫން މުއައްސަސާތަކަށް އިދިކޮޅު ޕީޕީއެމް/ޕީއެންސީ ކޯލިޝަނުން ގޮވާލައިފިއެވެ.

އިއްޔެ މަރުވި މީހަކީ، މަސްތުވާތަކެތީގެ މައްސަލައެއްގައި ޝަރީއަތް ނިމެންދެން ބަންދުކޮށްފައި ހުރި މީހެއްކަމަށް ކަރެކްޝަނުން ވަނީ ބުނެފައެވެ. އަދި އޭނާ ނޭވާ ނުލާތީ އޭނާހުރި ގޮޅީގައި ހުންނަ ބަންދުމީހަކު ޕްރިޒަން އޮފިސަރުންނަށް އެންގުމުން، އޭނާ މާފުށީ ޖަލުގެ މެޑިކަލް ސެންޓަރަށް ވަގުތުން ގެންގޮސް ސީޕީއާރް ދިން ކަމަށާއި ސީޕީއާރަށް ފަހުވެސް ނޭވާ ނުލުމުން، ޑޮކްޓަރު އިއްޔެ 17:26 ހާއިރު އޭނާ މަރުވި ކަމަށް ކަނޑައަޅާފައިވާ ކަމަށް ކަރެކްޝަންސުން ވަނީ ބުނެފައެވެ.

މި މައްސަލާގައި ޕީޕީއެމުން މިރޭ ނެރުނު ބަޔާނެއްގައި ބުނީ ކުއްލި ގޮތަކަށް ނޭވާ ނުލެވި ޖަލުގައި ނަޝީދު މަރުވުމުގެ ކުރިން އޭނާގެ ނޭވާއަށް އުނދަގޫ ވާކަން ޖަލުގެ އޮފިސަރުންނާއި ހިއްސާ ކުރުމުން ވެސް، އެކަމުގައި ފަރުވާ ކުޑަކޮށް، އެކަށީގެންވާ ފަރުވާ ދީފައި ނުވާ ކަމާއި، އަދި ތަކުރާރުކޮށް އަނިޔާ ކުރާކަމުގެ ޝަކުވާ ނަޝީދުގެ ވަކީލުންނަށް ލިބިފައިވާކަމަށް އިދިކޮޅު ކޯލިޝަނަށް މައުލޫމާތު ލިބިފައިވާ ކަމަށެވެ.

އެހެންކަމުން، މި މައްސަލައިގެ ފުރިހަމަ ތަހުގީގެއް ހިންގައި، މަރުގެ ހަގީގަތް ހާމަކުރުމަށާއި، މިކަމުގައި އިހުމާލުވާ ފަރާތްތައް އިންސާފުގެ ކުރިމައްޗަށް ގެނައުމަށާއި އަވަސް މައްސަލައެއްގެ ގޮތުގައި އެމައްސަލަ ބެލުމަށް ހިއުމަންރައިޓްސް ކޮމިޝަން އޮފް ދަ މޯލްޑިވްސް އާއި ދައުލަތުގެ ކަމާ ބެހޭ މުއައްސަސާތަކަށްވެސް ޕީޕީއެމުން ވަނީ ގޮވާލާފައެވެ.