މަރާމާތަށް ބަންދު ކޮށްފައިވާ އޮލިމްޕަހުގެ މަސައްކަތްތައް މިއަހަރުގެ އޮކްޓޫބަރުމަހުގެ ނިޔަލަށް ނިންމާލެވޭނެކަމަށް ލަފާކުރައްވާ ކަމަށް އާޓްސް، ކަލްޗަރ އެންޑް ހެރިޓޭޖް މިނިސްޓަރ ޔުމްނާ މައުމޫނު ވިދާޅުވެއްޖެއެވެ.

ރައްޔިތުންގެ މަޖިލީހުގެ މަޑަވެލި ދާއިރާގެ މެންބަރު ހުސައިން ފިރުޝާން ލިޔުމުން ޖަވާބު ހޯއްދެއްވުމަށް ކުރެއްވި ސުވާލަށް ލިޔުމުން ދެއްވި ޖަވާބުގައި މިނިސްޓަރު ޔުމްނާ ވިދާޅުވީ އޮލިމްޕަހުގައި ހިންގާ ހަރަކާތްތައް އިޝްތިހާރު ކުރުމަށް އޮލިމްޕަހުގެ މައި ގޭޓް މަތީގައި މިހާރު ލެޑް ޕެނަލްއެއް ހަރުކޮށްފައިވާ ކަމަށެވެ. އަދި އޮލިމްޕަސް ތަރައްޤީ ކުރުމުގެ ހުރިހާ މަސައްކަތެއް އަންނަ މަހުގެ ނިޔަލަށް ނިންމާލެވޭތޯ މަސައްކަތް ކުރަށްވާކަމަށް ޔުމްނާ ވިދާޅުވިއެވެ.

ޔުމްނާ ވިދާޅުވީ އޮލިމްޕަހުގެ ހޯލާއި ރިހާސަލް ރޫމުތަކަށް ބޭނުންވާ ބައެއް ސާމާނު ހޯދުމަށް ހަވާލުކުރި ފަރާތުން އެ މަސައްކަތް ކުރެވެން ނެތްކަމަށް އެންގުމުން އެ މަސައްކަތް މިއަހަރުގެ ނޮވެމްބަރު މަހުގެ 16 ވަނަ ދުވަހުގެ ނިޔަލަށް ނިންމުމަށް ސިންގަލް ސޯސް އުސޫލުން އެހެންފަރާތަކާ ހަވާލުކޮށްފައިވާ ކަމަށެވެ.

ހަމައެއާއެކު ފިލްމް ސްކްރީން ކުރުމަށް ޑިޖިޓަލް ސިނަމާ ޕްރޮޖެކްޓަރަކާއި 7.1 ސަރައުންޑް ސައުންްޑް އިންސްޓޯލްކުރުމާއި، ރިޓެކްޓަބަލް ސްކްރީނެއް ހޯދުމަށް ތިން ފަހަރު އިއުލާނުކުރުމުންވެސް އެއްވެސް ފަރާތަކުން ކުރިމަތިލާފައި ނުވާތީ އެ މަސައްކަތްވެސް ސިންގަލް ސޯސްކޮށް ކޮށްދޭނެ ފަރާތެއް ހޯދާ އަންނަ މަހުގެ 16 ވަނަ ދުވަހުގެ ނިޔަލަށް ނިންމުމަށް ހަވާލުކުރެވިފައިވާ ކަމަށް ޔުމްނާ ވިދާޅުވިއެވެ.

ހަމައެއާއެކު، އޮލިމްޕަހުގައި ނިންމަންޖެހޭ އެހެނިހެން މަސައްކަތްތައްވެސް އެކިފަރާތްތަކާ ޙަވާލުކޮށްގެން ނިންމުމުގެ މަސައްކަތް ކުރިއަށްދާ ކަމަށްވެސް މިނިސްޓަރު ވިދާޅުވި އެވެ.

އިންޑިއާ ސަރުކާރުގެ އެހީގައި ސަރުކާރުން ކުރިޔަށް ގެންދާ މި މަޝްރޫއު ކޮވިޑާއި ގުޅިގެން ދިމާވި ކަންކަމުގައި މަޑުޖެހުނު ނަމަވެސް، މިހާރު ދަނީ ބާރަށް ކުރިޔަށެވެ. ނަމަވެސް، އެ ޕްރޮޖެކްޓް ލަސްވަމުން ދާކަމަށާއި އެ މަސައްކަތް ނިންމަން މިނިސްޓްރީން މަސައްކަތް ނުކުރާކަމަށް ބުނެ ބައެއް ފަރާތްތަކުން ދަނީ ބުނަމުންނެވެ.

ރާއްޖޭގެ އެންމެ ގިނަދުވަސްވީ ސިނަމާގެ ގޮތުގައި މަޝްހޫރުވެފައިވާ އޮލިމްޕަހަކީ ދިވެހި ފަންނާނުން އުފައްދާ ފިލްމްތަކާއި ދިވެހި ފަންނާނުންގެ މުނިފޫހި ފިލުމުގެ އެކި ކަހަލަ ޝޯތަކާއި ހަފުލާތަކަށް ޚާއްޞަކޮށްފައިވާ ތަނެކެވެ.