ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށް ރައީސް ނަޝީދު އިސްވެ ހުންނަވައިގެން ކުރައްވަމުން ގެންދަވާ މަސައްކަތްޕުޅާ ގުޅިގެން ކުރަންޖެހޭ މަޝްވަރާތައް އެމްޑީޕީގެ ޗެއަރޕާސަން، އިކޮނޮމިކް މިނިސްޓަރު ފައްޔާޒު އިސްމާޢީލް އެބަ ކުރިއަށް ގެންދަވާކަމަށް ނަޝީދު ވިދާޅުވެއްޖެއެވެ.

އޮންލައިން ނޫހަކަށް ދެއްވި އިންޓަވިއުއެއްގައި ރައީސް ނަޝީދު މިއަދު ވިދާޅުވީ، ވެރިކަމުގެ ނިޒާމު ބަދަލު ކުރުމުގެ މަޝްވަރާތައް ފައްޔާޒު ފައްޓަވާފައިވާ ކަމަށާއި، އެކަމަށްޓަކައި ފައްޔާޒު ވަނީ ހާއްސަ ޓީމެއް އެކުލަވާލައްވާފައި ކަމަށެވެ. އަދި އެ ޓީމުގެ ތެރޭގައި އެ މަޝްވަރާތައް އެބަ ކުރިއަށް ގެންދަވާކަމަށް ރައީސް ނަޝީދު ވިދާޅުވިއެވެ.

އަދި އެ މައްސަލާގައި ރައީސް ނަޝީދާއިއެކު ފައްޔާޒު މަޝްވަރާތައް ކުރައްވާތޯ އެހުމުން ވިދާޅުވީ، ފައްޔާޒު ކުރައްވާ އެބާވަތުގެ ހުރިހާ ކަންކަމެއްގައި ވެސް ރައީސް ނަޝީދާއި މަޝްވަރާ ކުރައްވަމުން ގެންދަވާ ކަމަށެވެ.

ނަމަވެސް، ނިޒާމު ބަދަލު ކުރުމާގުޅޭ އެ މަޝްވަރާތަކުގެ އިތުރު މައުލޫމާތެއް އެމަނިކުފާނު ނުދެއްވައެވެ. އަދި ވިދާޅުވީ، ފައްޔާޒު ކުރައްވާ އެ މަސައްކަތުގެ މައުލޫމާތު ދެއްވަން އެންމެ ރަނގަޅުވާނީ ފައްޔާޒު ކަމަށެވެ.

ވެރިކަމުގެ ނިޒާމު ބަދަލު ކުރުމަށް ރައީސް ނަޝީދު އިސްވެ ހުންނަވާ ކުރައްވާ މަސައްކަތްޕުޅުގެ ތެރެއިން، އެންމެފަހުން ބޭއްވި އެމްޑީޕީގެ 4 ވަނަ ކޮންގްރެސްއަށް އެކަމާއިގުޅޭ ގަރާރެއް ހުށަހެޅުއްވިއެވެ. ނަމަވެސް، ފަހުވަގުތު ރައީސް ޞާލިޙާއި، ފައްޔާޒު އަދި ރައީސް ނަޝީދު ހިމެނޭހެން ކުރެއްވި ކުރު މަޝްވަރާއަކަށްފަހު ރައީސް ނަޝީދު ނިންމެވީ، ކޮންގްރެސްގައި އެކަމާ ބަހުސް ނުކޮށް ކޮންގްރެސްގެ ބޭރުން އެކަމުގައި ގޮތްތަކެއް ހޯދަން މަޝްވަރާ ކުރުމަށެވެ.