ހުޅުމާލެއިން ވިއްކާ 77 ބިމުގެ ބީލަން ފޯމު ހުޅުވުން މިއަދާއި މާދަމާ ކުރިއަށްދާނެކަމަށް ހައުސިންގ ޑިވެލޮޕްމަންޓް ކޯޕަރޭޝަނުން ހާމަކޮށްފިއެވެ.

އެޗްޑީސީން ބުނީ ބީލަން ފޯމު ބަލައިގަތުމާއި ހުޅުވުން ކުރިއަށްދާނީ ހ. މީރުމާ 2 ވަނަ ފަންގިފިލާގައި ކަމަށެވެ.

އެގޮތުން ބީޗް ފްރަންޓުން ވިއްކާ ގޯތިތަކުގެ ބީލަން ހުށައެޅުމާއި ބީލަން ފޯމު ހުޅުވުން މިއަދު ކުރިއަށް ގެންދިއުމަށް ވަނީ ހަމަޖެހިފައެވެ. އަދި ބީޗް ސައިޑުން ވިއްކާ ގޯތިތަކުގެ ބީލަން ހުށައެޅުމާއި ބީލަން ފޯމު ހުޅުވުން ކުރިއަށް ދާނީ މާދަމާއެވެ.

އެޗްޑީސީން ކޮށްފައިވާ އިޢުލާނުގައި ބުނެފައިވަނީ މިފަހަރު ވިއްކަނީ 1،095.05 އަކަފޫޓާއި 2،588.14 އަކާފޫޓާ ދެމެދުގެ 77 ބިންކަމަށެވެ. އޭގެ ތެރޭގައި ހިމެނެނީ ބީޗު ފްރަންޓުން 22 ބިމަކާއި ބީޗް ސައިޑުން 55 ބިމެކެވެ.

އެޗްޑީސީން ބުނީ ކޮންމެ މީހަކަށް ވެސް ގަނެވޭނީ އެންމެ ބިމެއް ކަމަށެވެ. ބީލަމުގައި ބައިވެރިވުމަށް އެންމެ ކުޑަ އަގެއްގެ ގޮތުގައި ބީޗު ފްރަންޓުން އަކަފޫޓަކަށް 6،500ރ އަދި ބީޗު ސައިޑުން އަކަފޫޓަކަށް 5،500ރ ހުށަހަޅަންޖެހެއެވެ. އަދި ބިޑް ސެކިއުރިޓީގެ ގޮތުގައި 1 މިލިއަން ރުފިޔާ ބަހައްޓަންޖެހޭނެއެވެ.

އެޗްޑީސީން ވަނީ މި އަހަރު ފެބްރުއަރީ މަހުވެސް ހުޅުމާލޭގެ ދެވަނަ ފިޔަވަހިން 60 ބިމެއް ބީލަމުގައި ވިއްކާފައެވެ.