ހުޅުމާލެ ބީޗް ފްރަންޓުން ވިއްކާ 22 ގޯތި ގަތުމަށް 18 ފަރާތަކުން އަގު ހުށައަޅައިފިއެވެ.

ހައުސިންގ ޑިވެލޮޕްމަންޓް ކޯޕަރޭޝަނުން ބުނީ، ހުޅުމާލެ ދެވަނަ ފިޔަވަހީގެ ބީޗްފްރަންޓުން ބީލަމުގެ އުސޫލުން ގޯތި ގަތުމަށް އެދި ބީލަން ހުށަހެޅުން އިއްޔެ ކުރިއަށްގެންގޮސްފައިވާ ކަމަށެވެ.

އެގޮތުން ބީޗް ފްރަންޓުން ވިއްކަން އިއުލާންކުރި 22 ގޯއްޗަށް ހުށަހެޅި ބީލަންތަކުގެ ތެރެއިން އެންމެ ބޮޑު އަގަކަށް އަކަފޫޓެއް 8،251 ރުފިޔާއަށް ގަންނަން ހުށަހަޅާފައިވަނީ ހަސީނާ އިބްރާހިމްގެ ނަމުގައި ބިޑު ކޮށްފައިވާ މީހެކެވެ. ދެވަނައަށް އެންމެ ބޮޑުއަގެއް ހުށައަޅާފައިވާ އާދަމް ނަޒީރު ހުސެއިން 8،141 ރުފިޔާ އަކަފޫޓަކަށް ހުށައަޅާފައިވާއިރު އެންމެ ކުޑަކޮށް އަގުހުށައެޅި ނާދިރާ ޖަމީލް ހުށައަޅާފައިވަނީ 6،501 ރުފިޔާއެވެ.

މި 22 ގޯއްޗަށް 18 ފަރާތަކުން ބިޑް ކުރި ނަމަވެސް 1 ފަރާތުގެ ބިޑް ވަނީ ރިޖެކްޓްވެފައެވެ.

އެޗްޑީސީން ބުނީ ބީޗްސައިޑުން ގޯތިގަތުމަށް ބީލަން ހުށަހެޅުން މިއަދު ކުރިއަށް ގެންދިއުމަށް ހަމަޖެހިފައިވާ ކަމަށެވެ. ބީޗްސައިޑުން ވިއްކުމަށް ހަމަޖެހިފައިވަނީ 55 ގޯއްޗެވެ. އެޗްޑީސީން ބުނީ ބީލަން ފޯމު ބަލައިގަތުމާއި ހުޅުވުން ކުރިއަށްދާނީ ހ. މީރުމާ 2 ވަނަ ފަންގިފިލާގައި ކަމަށެވެ.

އެޗްޑީސީން ކޮށްފައިވާ އިޢުލާނުގައި ބުނެފައިވަނީ މިފަހަރު ވިއްކަނީ 1،095.05 އަކަފޫޓާއި 2،588.14 އަކާފޫޓާ ދެމެދުގެ 77 ގޯތިކަމަށެވެ.

އެޗްޑީސީން ބުނީ ކޮންމެ މީހަކަށް ވެސް ގަނެވޭނީ އެންމެ ގޯއްޗެއް ކަމަށެވެ. ބީލަމުގައި ބައިވެރިވުމަށް އެންމެ ކުޑަ އަގެއްގެ ގޮތުގައި ބީޗު ފްރަންޓުން އަކަފޫޓަކަށް 6،500ރ އަދި ބީޗު ސައިޑުން އަކަފޫޓަކަށް 5،500ރ ހުށަހަޅަންޖެހެއެވެ. އަދި ބިޑް ސެކިއުރިޓީގެ ގޮތުގައި 1 މިލިއަން ރުފިޔާ ބަހައްޓަންޖެހޭނެއެވެ.

އެޗްޑީސީން ވަނީ މި އަހަރު ފެބްރުއަރީ މަހުވެސް ހުޅުމާލޭގެ ދެވަނަ ފިޔަވަހިން 60 ބިމެއް ބީލަމުގައި ވިއްކާފައެވެ.