ރާއްޖޭގައި މަސްތުވާތަކެތީގެ ވިޔަފާރި ފުޅާދާއިރާއެއްގައި ކުރާކަމަށް ފުލުހުން ތުހުމަތުކުރާ އަރުޝަދު ޚާލިދު ރާއްޖެއިން ބޭރުގައި އުޅެނިކޮށް ރާއްޖެއަށް ގެނެސްފިއެވެ.

2020 ވަނަ އަހަރުގެ ޖަނަވަރީ މަހުގެ ފަހުކޮޅު މާލެއިން އަތުލައިގަތް 9 ކިލޯގެ މަސްތުވާތަކެތީގެ މައްސަލައިގައާއި، މިދިޔަ އަހަރުގެ ޑިސެމްބަރު މަހުގެ 12 ވަނަ ދުވަހު ފުލުހުން ހިންގި ހާއްސަ އޮޕަރޭޝަނެއްގައި އަތުލައިގަތް 119 ކިލޯގެ މަސްތުވާތަކެތި ރާއްޖެ އެތެރެކުރުމުގައި އެންމެ އިސްކޮށް ހުރިކަމަށް ފުލުހުން ތުހުމަތުކުރާ އަރުޝަދު ރާއްޖެއަށް ގެނެސްފައިވަނީ ރޭގެ ވަގުތެއްގައެވެ.

ގދ. ހޯޑެއްދޫ އަލޯރާ، އަރުޝަދު ޚާލިދު ދުބާއީން ޑީޕޯޓްކޮށްލުމުން ލަންކާ މަގުން ރާއްޖެ ގެނެސްފައިވާކަމަށް މަޢުލޫމާތު ލިބިފައިވާއިރު މިކަމާ ގުޅިގެން ފުލުހުން އަދި ރަސްމީކޮށް އެއްވެސް ބަހެއް ބުނެފައެއް ނުވެއެވެ.

31 ޖަނަވަރީ 2020 އިން ފެށިގެން ހަތެއް ފެބްރުވަރީ 2020 އާ ހަމައަށް ފުލުހުން ހިންގި އޮޕަރޭޝަނެއްގައި 10 ގެއަކާއި ވެހިކަލްތަކެއް ބަލައި، ފާސްކޮށް، ނުވަ ކިލޯގެ މަސްތުވާތަކެތި އަތުލައިގަނެ، ހައްޔަރުކުރި މީހުންގެ ތެރެއިން އަށް މީހެއްގެ މައްޗަށް ދައުވާކޮށްފައިވެއެވެ. ކްރިމިނަލް ކޯޓަށް ހުށަހެޅި މައްސަލައިގައި 3.7 މިލިއަން ރުފިޔާ ދައުލަތަށް ނަގައިދޭންވެސް ވަނީ އެދިފައެވެ. ނަމަވެސް އެ މައްސަލާގައި ކުށް ސާބިތުވީ ދެމީހެއްގެ މައްޗަށެވެ. ފުލުހުން ތުހުމަތުކުރަނީ މިއީ އަރުޝަދު އިސްވެހުރެ ހިންގަމުންދިޔަ ވިޔަފާރިއެއް ކަމަށެވެ.

ހަމައެއާއެކު މިދިޔަ 2021 ވަނަ އަހަރުގެ ފަހުކޮޅު މާލެ އާއި ހުޅުމާލޭގައި ހިންގި އޮޕަރޭޝަނެއްގައި އަތުލައިގަތް 119 ކިލޯގެ މަސްތުވާތަކެތި ރާއްޖެއަށް އެތެރެކުރުމުގައި އިސްކޮށް ހަރަކާތްތެރިވި އެކަކީވެސް އަރުޝަދު ކަމަށް ފުލުހުން ތުހުމަތުކުރެ އެވެ. އަދި މާލެއަށް މަސްތުވާތަކެތި އެތެރެކުރުމަށްފަހު އަރުޝަދު ވަނީ ޑިސެމްބަރުމަހު ރާއްޖެއިން ބޭރަށް ފުރައިގެން ގޮސްފައި ކަމަށް ފުލުހުން ވަނީ ބުނެފައެވެ. އެފަހުން އަރުޝަދު ދިރިއުޅެމުން ގެންދިޔައީ ރާއްޖެއިން ބޭރުގައެވެ.