ފުލުހުން ހިންގި އެންޓި ޓެރަރިޒަމް އޮޕަރޭޝަނުގައި ހައްޔަރުކުރި ފަސް މީހަކު ޝަރީޢަތް ނިމެންދެން ބަންދުކޮށްފައިވާ ކަމަށް ފުލުހުން ހާމަކޮށްފިއެވެ.

ރާއްޖޭގައި ދިނުމަށް މަސައްކަތްކުރި ޓެރަރިސްޓް ހަމަލާއެއް ފެއިލްކޮށްލާފައިވާ ކަމަށް ފުލުހުން ބުނީ މިމަހުގެ 14ވަނަ ދުވަހު އެވެ. ފުލުހުން ހިންގި އޮޕަރޭޝަނެއްގައި މައްސަލައިގައި ތުހުމަތު ކުރެވޭ މީހުން ހައްޔަރުކުރީ އައްޑޫ ސިޓީ އާއި މާލޭގެ އިތުރުން ކ. ގުރައިދޫންއިން ނެވެ.

މި މައްސަލައިގައި އައްޑޫ ސިޓީން 10 ފިރިހެނުންނާއި މާލެއިން ދެ ފިރިހެނުން އަދި ކ. ގުރައިދޫން ދެ ފިރިހެނުން ހައްޔަރުކޮށްފައިވެ އެވެ. މި އެންމެންނަކީ ވެސް ދިވެހިންނެވެ.

ފުލުހުން ބުނީ ހައްޔަރުކުރި މީހުންގެ ތެރެއިން 20 އަހަރުގެ މީހަކާއި 27 އަހަރުގެ މީހަކާއި 30 އަހަރުގެ މީހަކާއި 35 އަހަރުގެ މީހަކާއި 37 އަހަރުގެ މީހާ ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން އަމުރުކޮށްފައިވާ ކަމަށެވެ.

ހަމައެއާއެކު މައްސަލައިގައި ހިމެނޭ 18 އަހަރުގެ މީހަކާއި 33 އަހަރުގެ ދެ މީހުންނާއި 35 އަހަރުގެ މީހަކާއި 46 އަހަރުގެ މީހަކަށް ކޯޓުން ވަނީ 15 ދުވަހުގެ ބަންދުގެ މުއްދަތު ދީފަ އެވެ. އޭގެ އިތުރުން 19 އަހަރުގެ މީހާ އާއި 27 އަހަރުގެ ދެ މީހުންނާއި 28 އަހަރުގެ މީހާއަށް 30 ދުވަހުގެ ބަންދުގެ މުއްދަތު ކޯޓުން ވަނީ ދީފަ އެވެ.

މި އޮޕަރޭޝަނާއި ގުޅިގެން ފުލުހުން ބުނެފައިވަނީ ހައްޔަރުކުރި މީހުންނަކީ އިސްލާމިކް ސްޓޭޓްއަށް ތާއީދުކުރާ ބައެއް ކަމަށާއި ހައްޔަރުކުރެވުނު މީހުންގެ ތެރެއިން ނުވަ މީހަކީ ޓެރަރިޒަމްގެ ކުށުގެ ތުހުމަތުގައި ކުރިންވެސް ހައްޔަރުކުރެވުނު ބައެއް ކަމަށެވެ.

އިސްލާމިކް ސްޓޭޓަށް ތާއީދުކުރާ އެ މީހުން މަސައްކަތްކުރީ ރާއްޖޭގައި ޓެރަރިސްޓް ހަމަލާއެއްދީ ގިނަ ބައެއްގެ ފުރާނަ ގެއްލުވާލަން ކަމަށާއި އެ ރޭވުން ނާކާމިޔާބު ކޮށްލައި ގިނަޢަދަދެއްގެ ގޮވާ ޒާތުގެ ތަކެތި އަތުލާފައިވާ ކަމަށް ފުލުހުން ހާމަކޮށްފައިވެއެވެ.