އީޔޫއަކީ އަބަދުވެސް ރާއްޖޭގެ އިޤްތިޞާދުގައި މުހިންމު ބައިވެރިއެއްކަމަށް އިޤްތިޞާދީ ވަޒީރު ފައްޔާޟް އިސްމާޢީލް ވިދާޅުވެއްޖެއެވެ.

ފައްޔާޟް މިމޭރުމުން ވިދާޅުވީ، "އީޔޫ-މޯލްޑިވްސް ބިޒްނަސް ރައުންޑް ޓޭބަލް" ބައްދަލުވުމުގައި އިއްޔެ ވާހަކަފުޅުދައްކަވަމުންނެވެ. ހޮޓެލް ޖެންގައި ކުރިއަށްގެންދިޔަ މި ބައްދަލުވުމުގައި ފައްޔާޟް ވިދާޅުވީ ކޯވިޑް-19 ގެ ޙާލަތުގައި އީޔޫއިން ރާއްޖޭގެ ވިޔަފާރިތަކަށް ފޯރުކޮށްދިން އެހީތެރިކަމަކީ ކޯވިޑުން އަރައިގަތުމަށް ރާއްޖެއަށް ލިބުނު ވަރަށްބޮޑު ބާރެއް ކަމަށެވެ.

މި ބައްދަލު ކުރެއްވުމުގައި ފައްޔާޟް ވިދާޅުވީ އީޔޫއަކީ އަބަދުވެސް ރާއްޖޭގެ އިޤްތިޞާދުގައި މުހިންމު ބައިވެރިއެއް ކަމަށެވެ. އެގޮތުން ރާއްޖޭގެ ފަތުރުވެރިކަމުގެ ދިގު ތާރީޚުގައި އީޔޫގެ ޤައުމުތައް ރާއްޖޭގެ ފަތުރުވެރިކަމުގައި އަދާކޮށްފައިވާ ދައުރުގެ މުހިންމުކަން ފައްޔާޟް ފާހަގަކުރެއްވިއެވެ.

ކޯވިޑް-19 އާއި ގުޅިގެން ޔޫރަޕިއަން ޔޫނިއަން (އީޔޫ) އިން ދިވެހި ރާއްޖެއަށް ތިން މިލިއަން ޔޫރޯގެ އެހީތެރިކަން ފޯރުކޮށްދީފައިވެއެވެ. މި ފައިސާގެ ތެރޭގައި ހިމެނެނީ ސިއްހީ ދާއިރާ އަށް ދިން އެއް މިލިއަން ޔޫރޯ އާއި ފަތުރުވެރިކަމުގެ ދާއިރާއަށް ކަނޑައަޅާފައިވާ ދެ މިލިއަން ޔޫރޯއެވެ.

މޯލްޑިވްސް ފަންޑް މެނޭޖްމަންޓް ކޯޕަރޭޝަނުން ޢާއްމުކޮށްފައިވާ ތަފާސް ހިސާބުތައް ދައްކާގޮތުން މި އެހީގެ ދަށުން މިދިޔަ ޖުލައިމަހުގެ ނިޔަލަށް 13،078،540 (ތޭރަ މިލިއަން ހަތްދިހަ އަށްހާސް ފަސް ސަތޭކަ ސާޅީސް) ރުފިޔާގެ ލޯނު ވަނީ ދޫކޮށްފައެވެ. އެއީ ޖުމްލަ 286 ގެސްޓްހައުސްއަކާއި 59 ސަފާރީއަކަށް ދޫކޮށްފައިވާ އެހީއެވެ.