119 ކިލޯގެ މަސްތުވާތަކެތީގެ މައްސަލާގައި ހިމެނޭ އަހްމަދު މުޖާހިދު ބަންދުން ދޫކޮށްލުމަށް ކްރިމިނަލް ކޯޓުން ކުރި އަމުރު ބާތިލުކޮށް އޭނާ ބަންދުގައި ބެހެއްޓުމަށް ކޮށްފައިވާ އަމުރު ދެމިއޮތްކަމަށް ހައިކޯޓުން ނިންމައިފިއެވެ.

ދިވެހިރާއްޖެއަށް މަސްތުވާތަކެތި އެތެރެކޮށް ވިޔަފާރިކުރާކަަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ޑްރަގް އެންފޯސްމަންޓުން މާލެއާއި ހުޅުމާލޭގައި މިދިޔަ އަހަރުގެ ޑިސެމްބަރު މަހުގެ 12 އިން 14 އަށް ހިންގި ހާއްސަ އޮޕަރޭޝަންތަކެއްގައި 119 ކިލޯގެ މަސްތުވާތަކެއްޗާއެކު ތިން މީހަކު ހައްޔަރުކޮށް ދަޢުލަތުން ވަނީ ދަޢުވާ އުފުލާފައެވެ.

އެގޮތުން މި މައްސަލާގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން އުފުލާފައިވަނީ ގދ. ހޯނޑެއްދޫ / އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ / ގުލޭނޫރަންމާގެ، އަލީ ޒުބައިރުގެ އިތުރުން، ގދ ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.

އެ ތިން މީހުން ޝަރީއަތް ނިމެންދެން ރިމާންޑް ޖަލެއްގައި ބަންދު ކުރުމަށް ނިންމީ މިދިޔަ މާޗު މަހުގެ ނުވަ ވަނަ ދުވަހުއެވެ. ނަމަވެސް މައްސަލަ ބައްލަވާ ޤާޟީ ދީބާނާޒް ފަހުމީ މިދިޔަ އޯގަސްޓު މަހުގެ ނުވަ ވަނަ ދުވަހު ހައިކޯޓުގެ ފަނޑިޔާރަކަށް އައްޔަންކުރި ފަހުން އެ މައްސަލާގައި އަޑުއެހުމެއް ބާއްވާފައެއް ނުވެއެވެ.

އެމީހުން ބަންދުކުރުމަށް ޤާޟީ އޭރު ނިންމެވީ އެމީހުން ބަންދުކުރުމަށް އެކަށީގެންވާ ހެކި ހުރިކަމަށް ފާހަގަކުރުމަށްފަހުއެވެ. އެހެން ނަމަވެސް މައްސަލަ ބަލާ ސެކްޝަންގައި ދާއިމީ ފަނޑިޔާރަކު ނެތި މައްސަލަ ލަސްވާ ކަމަށް ބުނެ ކްރިމިނަލް ކޯޓުން ވަނީ މައްސަލާގައި ހިމެނޭ މުޖާހިދު ދޫކޮށްލާފައެވެ.

މުޖާހިދު ދޫކޮށްލި މައްސަލަ ޕީޖީ އޮފީހުން ހައިކޯޓުގައި އިސްތިޢުނާފް ކުރުމުން އެ ކޯޓުން މިއަދު އިއްވާފައިވާ ޙުކުމުގައި ބުނެފައިވަނީ މައްސަލަ ބަލާ ސެކްޝަންގައި ދާއިމީ ފަނޑިޔާރަކު ނެތުމަކީ ތުހުމަތުގައިވާ މީހާ ބަންދުކުރުމަށް ނުވަތަ ބަންދުން ދޫކޮށްލުމަށް ބެލިދާނެ ޤާނޫނީ ސަބަބެއް ނޫންކަމަށެވެ. އެހެންކަމުން މުޖާހިދު ބަންދުގައި ބެހެއްޓުމަށް ނިންމި ނިންމުން ބާތިލުނުވެ ދެމިއޮތްކަމަށް ހައިކޯޓުން ޙުކުމް ކުރަށްވާފައިވެއެވެ.

މި މައްސަލައާ ގުޅިގެން ފުލުހުން ހިންގި މަސްތުވާތަކެތީގެ އޮޕަރޭޝަންތަކުގައި މާލޭގެ ތިން ގެއަކާއި ހުޅުމާލޭގެ ގެއަކާއި ޓެކްސީ އަކާއި ޕްރައިވެޓް ކާރެއް އަދި ތިން ސައިކަލް ބަލައިފާސްކޮށްފައިވެއެވެ. މިގޮތުން ޑިސެމްބަރު 12 ވަނަ ދުވަހު މާލެއިން ޓެކްސީއެއް ހުއްޓުވައި ބަލައިފާސްކޮށް ގިނަ އަދަދެއްގެ މަސްތުވާތަކެތި ފުލުހުންގެ ބެލުމުގެ ދަށަށް ގެނެސް ދެ މީހަކު ހައްޔަރުކޮށްފައިވެއެވެ.

އަދި ޑިސެމްބަރު 13 ވަނަ ދުވަހު ސައިކަލެއް ބަލައިފާސްކޮށް، ސައިކަލްގެ މަޑިދަށުން ގިނަ އަދަދެއްގެ މަސްތުވާތަކެތި ހޯދާފައިވާއިރު، ޑިސެމްބަރު 14 ވަނަ ދުވަހު މައްސަލައާ ގުޅުންހުރި އިތުރު މީހަކު ހައްޔަރުކޮށް ހުޅުމާލެއިން ކާރެއް ހުއްޓުވައި ބަލައިފާސްކޮށްފައިވެއެވެ. އަދި އެކާރު ބަލައިފާސްކޮށް ގިނަ އަދަދެއްގެ މަސްތުވާތަކެތި ހޯދާފައިވެއެވެ.