ޚާއްސަ އެހީއަށް ބޭނުންވާ ކުދިންނަށް މިސަރުކާރުން ޚާއްސަ އަހަންމިއްޔަތުކަމެއްދޭ ކަމަށް ތަޢުލީމާބެހޭ ވަޒީރު ޑރ. އައިޝަތު ވިދާޅުވެއްޖެއެވެ.

ޚާއްސަ އެހީއަށް ބޭނުންވާ ކުދިންނަށް ތައުލީމު ފަހިކޮށްދިނުމާ ގުޅޭ ސެމިނާ ފެއްްޓެވުމުގެ ގޮތުން ވާހަކަފުޅުދައްކަވަމުން މިނިސްޓަރު ވިދާޅުވީ ޚާއްސަ އެހީއަށް ބޭނުންވާ ކުދިންނަށް ތަޢުލީމާއި ހުނަރު ފޯރުކޮށްދިނުމަށް ސަރުކާރުން ޚާއްސަ އަހަންމިއްޔަތުކަމެއް ދޭކަމަށެވެ.

އެގޮތުން ލާނިން ރިކަވަރީ ސްޓްރެޓެޖީއެއް ތައްޔާރުކޮށް، ސްކޫލުތަކަށް ބޭނުންވާ ތަމްރީނުތައް ފޯރުކޮށްދެމުންދާކަމަށް މިނިސްޓަރު ވިދާޅުވިއެވެ.

މިނިސްޓަރ ވިދާޅުވީ މިއަދު ބާއްވާ މަސައްކަތު ބައްދަލުވުމަކީ ވެސް އެ ކަމުގެ އެއްބައި ކަމަށެވެ. އެގޮތުން ދަރިވަރުންގެ އުނގެނުން ކޯވިޑްގެ ކުރިން ހުރި މިންވަރަށް ގެނައުމަށް އެކި މުއައްސަސާތަކާއެކު މަސައްކަތް ކުރަމުން އަންނަކަމަށް މިނިސްޓަރު ވިދާޅުވިއެވެ.

"އަޅުގަނޑުމެން ވަރަށް ބޮޑަށް ބޭނުންވޭ ތިޔަ ކުދިންގެ އަޑު އަހައިލައި، އިތުރަށް ތިޔަ ކުދިންގެ ކިޔެވުން ބައްޓަން ކުރާނެ ގޮތްތަކާ މެދު މަޝްވަރާކޮށް، އަޅުގަނޑުމެންގެ ސިޔާސަތުތައް އެ ކަންކަމަށް ރިއާޔަތްކޮށް ރާވަން،" މިނިސްޓަރު ވިދާޅުވިއެވެ.

މިނިސްޓަރ މިއަދު ވިދާޅުވީ ކޯވިޑްގެ ހާލަތުގައި ވެސް ޓެލިކްލާސް މެދުވެރިކޮށް ތައުލީމު މެދުނުކެނޑި ފޯރުކޮށްދެވޭތޯ އެޑިއުކޭޝަން މިނިސްޓްރީން ގިނަ މަސައްކަތްތަކެއް ކޮށްފައިވާކަމަށެވެ.

ވަކިން ޚާއްސަކޮށް، ޚާއްސައެހީއަށް ބޭނުންވާ ދަރިވަރުންނަށް ފިލާވަޅުތައް ފޯރުކޮށްދިނުމާއި، ވަކިވަކި ކުދިންގެ ހަލާތަށް ރިއާޔަތްކޮށް، ބެލެނިވެރިންގެ އެހީތެރިކަމާއެކު ގިނަ ހަރަކާތްތައް ސްކޫލުތަކުން ކުރިއަށް ގެންދިޔަކަންވެސް މިނިސްޓަރ މިއަދު ފާހަގަކުރެއްވިއެވެ.