ހުޅުމާލޭގައި 23 ގަރާޖު ތަރައްޤީ ކުރުމަށް ބިން ދޫކުރުމަށް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން އިޢުލާނުކޮށްފިއެވެ.

އެޗްޑީސީން ބުނީ ގަރާޖު ބިންތަކަށް ފޯމު ހުށަހެޅުމުގެ ސުންގަޑިއަކީ ޖެނުއަރީ 2 ވަނަ ދުވަހުގެ 2:00 ކަމަށެވެ. އަދި އެޗްޑީސީގެ ރިސެޕްޝަނުންނާއި އީމެއިލް މެދުވެރިކޮށް ފޯމު ބަލައިގަންނާނެ ކަމަށް އެޗްޑީސީން ބުނެއެވެ.

މާލޭގައި މިހާރު ހިންގަމުންދާ ގަރާޖުތަކުގެ ތެރެއިން، 1000 އަކަފޫޓަށްވުރެ ކުދި ގަރާޖުތަކަށް ހުޅުމާލެއިން 1000 އަކަފޫޓޫ އަދި 1000 އަކަފޫޓަށްވުރެ ބޮޑެތި ގަރާޖުތަކަށް 1300 އަކަފޫޓުގެ ބިން ދޫކުރުމަށް އެޗްޑީސީން ނިންމީ ނޮވެމްބަރު ފަހުކޮޅުގައެވެ. އެޗްޑީސީން މިހާރު ހަމަޖައްސާފައިވަނީ ހުޅުމާލެއިން ދޫކުރާ ބިންތަކުގައި އަޅާ ގަރާޖުތައް 2 ފަންގިފިލާއަށް އިމާރާތް ކުރެވޭނެ ގޮތަށެވެ.

އެޗްޑީސީން ބުނެފައިވަނީ މި ބިންތަކަށް ކުރިމަތިލުމަށް ހުށަހަޅާ ފޯމް އެޗްޑީސީގެ ވެބްސައިޓުން ލިބެން ހުންނާނެ ކަމަށެވެ. އަދި ފޯމު ހުށަހެޅުމަށް ދީފައިވާ ސުންގަޑި ހަމަވުމުން، ލިބިފަިއވާ ފޯމުތަކާއި ލިޔެކިޔުންތައް ބަލައި ފޯމާއި ބެހޭ އިތުރު މައުލޫމާތު ބޭނުންވާނަމަ އެ ފަރާތްތަކަށް އެންގޭނެ ކަމަށް އެޗްޑީސީގެ އިޢުލާނުގައިވެއެވެ.