އިސްލާމިކް މިނިސްޓްރީގެ ކުރީގެ ޕާމަނަންޓް ސެކްރެޓަރީ މުޞްޢަބު ޢަބްދުﷲ އަށް 1.1 މިލިއަން ރުފިޔާއަށްވުރެ ބޮޑު ޢަދަދެއްގެ ބަދަލެއް ދިނުމަށް ހައިކޯޓުން ކުރިޙުކުމް ތަންފީޒުކުރުން މަޑުޖައްސާލުމަށް ސްޕްރީމްކޯޓުން އަމުރުކޮށްފިއެވެ.

އިސްލާމިކް މިނިސްޓްރީގެ ޕީއެސްގެ މަގާމަށް 25 ޖުލައި 2017 ގައި އައްޔަން ކުރި މުސްޢަބު ސަސްޕެންޑު ކުރީ މެއި 2019 ގައެވެ. މުސްޢަބް ވަޒީފާ އިން ސަސްޕެންޑް ކުރީ އިސްލާމިކް މިނިސްޓްރީގެ ސިއްރު ލިޔުމެއް ޓްވިޓާ މެދުވެރިކޮށް ލީކު ކުރި ކަމަށް ބުނެ އެވެ. އެއީ މުސްޢަބާއި އިތުރު މީހަކު ގުޅިގެން އެ މިނިސްޓްރީގެ ފައިސާއަށް ހިޔާނާތްތެރިވި ކަމަށް ބުނާ މައްސަލައެއް އޭސީސީން ތަހުގީގުކޮށް މިނިސްޓްރީއަށް އޭސީސީން މައްސަލަ ނިންމައި ފޮނުވި ސިޓީއެކެވެ.

ގިނަ ދުވަސްތަކެއްވަންދެން ސަސްޕެންޝަނުގައި ބެހެއްޓުމަށްފަހު، މުޞްޢަބު މަޤާމުން ވަކިކުރީ 2019 ސެޕްޓެމްބަރު މަހުގައެވެ. އެ މައްސަލާގައި ވަޒީފާ އިއާދަކުރުމާ ހަމައަށް ލިބެންޖެހޭ މުސާރައާއި އިނާޔަތްތައް ހޯދަން ސިވިލް ކޯޓުގައި މުސްޢަބު ދަޢުވާކުރުމުން 2020 ވަނަ އަހަރު ސިިވިލް ކޯޓުން ޙުކުމްކުރީ މުޞްޢަބު މަޤާމުން ވަކިކުރީ ޤާނޫނާ ޚިލާފަށްކަމަށް ސާބިތުނުވާ ކަމަށެވެ.

އެހެންނަމަވެސް މުސްޢަބުގެ ފަރާތުން އެ މައްސަލަ ހައިކޯޓުގައި އިސްތިއުނާފުކުރުމުން އެ ކޯޓުން މިއަހަރުގެ އޯގަސްޓު މަހުގެ 28 ވަނަ ދުވަހު ކުރި ޙުކުމުގައި ބުނެފައިވަނީ މުޞްޢަބު މަޤާމުން ވަކިކުރީ ޤާނޫނާ ޚިލާފަށްކަމަށް ސާބިތުވާ ކަމަށެވެ. އެހެންކަމުން މުޞްޢަބު މަޤާމުން ވަކިކުރުމަށްފަހު އެ މަޤާމަށް އެހެން މީހަކު އައްޔަންކޮށްފައިވާތީ ހޯދައިދެވެންއޮތް ހައްލަކީ ބަދަލު ނަގައިދިނުން އެކަނި ކަމަށާއި، ބަދަލުގެ ގޮތުގައި 1.1 މިލިއަން ރުފިޔާ ދިނުމަށް ޙުކުމްކުރާ ކަމަށް ހައިކޯޓުން ނިންމަވާފައިވެއެވެ.

އެޙުކުމަށް ސީއެސްސީން ޢަމަލުނުކުރުމުން، ތިން ދުވަސް ތެރޭގައި ހައިކޯޓުގެ ހުކުމް ތަންފީޒުކުރުމަށް ސިވިލް ކޯޓުން އިތުރު އަމުރެއް ވެސް ނެރުނެވެ. ނަމަވެސް، ހައިކޯޓުގެ ޙުކުމް ސިވިލް ސާވިސް ކޮމިޝަނުން ވަނީ ސުޕްރީމް ކޯޓުގައި އިސްތިއުނާފް ކޮށްފައިވެއެވެ.

އެގޮތުން މައްސަަލަ ނިމެންދެން ހައި ކޯޓުގެ ހުކުމަށް އަމަލުކުރުން ފަސްކުރުމުގެ އަމުރަކަށް ސީއެސްސީން އެދުމުން ސުޕްރީމް ކޯޓުން މިއަދު ނެރުނު އަމުރުގައި ވަނީ އެ ކޯޓުން މައްސަލާގައި ވަކިގޮތެއް ނުނިންމަނީސް ހައިކޯޓުގެ ހުކުމް ތަންފީޒުކޮށްފިނަމަ އިންސާފު ގާއިމްކުރަން ހުރަސް އެޅިދާނެ ކަމަށް ބެލެވޭ ކަމަށެވެ. އެހެންކަމުން އެ މައްސަލަ ސުޕްރީމް ކޯޓުން ބަލާ ނިމެންދެން ހައިކޯޓުގެ ނިންމުން ތަންފީޒުކުރުން ފަސްކުރުމަށް ސުޕްރީމް ކޯޓުން މިއަދު ވަނީ އަމުރުކޮށްފައެވެ.

މި މައްސަލަ ސުޕްރީމް ކޯޓުގައި ބައްލަވަނީ، ފަނޑިޔާރު އައިޝާ ޝުޖޫން މުހައްމަދާއި ފަނޑިޔާރު އަޒްމިރަލްދާ ޒާހިރާއި، ފަނޑިޔާރު މަހާޒް އަލީ ޒާހިރެވެ.