ދެމީހުންނާއެކު ވިލިމާލެއިން ފުރި ތެޔޮ ބޯޓު ފެނިފައިވާކަމަށާއި ނަމަވެސް އެބޯޓުން ދަތުރުކުރި މީހުން ނުފެންނަ ކަމަށް ފުލުހުން ހާމަކޮށްފިއެވެ.

ފުލުހުން ބުނީ މި ތެޔޮބޯޓު ވިލިމާލެއިން ފުރާފައި ވަނީ މި މަހުގެ 28 ވަނަ ދުވަހުގެ ރޭ ކަމަށެވެ. މި ތެޔޮ ބޯޓުގެ ހަބަރެއް ނުވެގެން ފުލުހުންނަށް ރިޕޯޓުކޮށްފައިވަނީ ޑިސެމްބަރު 29 ވަނަ ދުވަހުގެ ވަގުތެއްގައެވެ.



ފުލުހުން މިއަދު ބުނީ ދެ މީހުން ދަތުރުކުރި ތެޔޮބޯޓު، އެއާޕޯޓު ނެރުކައިރިން އޮޔާދަނިކޮށް ޑިސެމްބަރ 29 ވަނަ ދުވަހު ފެނިފައިވާ ކަމަށެވެ. ނަމަވެސް ބޯޓުން ދަތުރުކުރި ދެ މީހުން ފެނިފައިނުވާކަމަށް ފުލުހުން މަޢުލޫމާތުދެއެވެ.

ގެއްލިގެން ހޯދަމުން އަންނަނީ، ގދ. ތިނަދޫ މަނާރު، މުޙައްމަދު ނިޡާމް (45އ) އާއި ބަންގްލަދޭޝް ރައްޔިތެއް ކަމުގައިވާ މޮހައްމަދު ލިޓަން (35އ) ކަމަށް ފުލުހުން ވަނީ ބުނެފައެވެ.

މުޙައްމަދު ނިޡާމް އަދި މޮހައްމަދު ލިޓަންއާ ގުޅޭ އެއްވެސް މައުލޫމާތެއް ލިބިފައިވާނަމަ ފުލުހުންގެ ހޮޓްލައިން 3322111 އަށް ނުވަތަ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުގެ 9911099 އަށް ގުޅާ އެކަން ހިއްސާކުރުމަށް ފުލުހުން އެދިފައި ވެއެވެ.