އިއްޔެ ހއ. އަތޮޅުން ފެނިފައިވަނީ ހައިޑްރޯގްރެފިކް ސަރވޭކުރާ މަނަވަރު ކަމަށް މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފުން ހާމަކޮށްފިއެވެ.

އިއްޔެގެ ވަގުތެއްގައި ހއ. އަތޮޅުން މަނަވަރެއް ފެނުމާ ގުޅިގެން އެއީ ހަނގުރާމަ މަތީ މަނަވަރެއްތޯ ސުވާލު އުފައްދައި، ބޮޑު ކަންނެލި މަސްވެރިންގެ ޔޫނިއަންގެ ފަރާތުން ވަނީ ކަންބޮޑުވުން ފާޅުކޮށްފައެވެ. އަދި އެފަދަ އުޅަނދުތައް ދިވެހި މަސް ކަނޑުގައި ހަރަކާތްތެރިވާނަމަ، މަސްވެރިންނަށް އެމައުލޫމާތު ދިނުމަކީ މުހިންމު ކަމެއް ކަމުގައި ދެކޭކަމަށް އެ ޔޫނިއަނުން ވަނީ ބުނެފައެވެ.

އެކަމާ ގުޅިގެން އެމްއެންޑީއެފުން މިއަދު ބުނީ އެމަނަވަރަކީ މޯލްޑިވްސް ހައިޑްރޯގްރަފިކް ސާވިސް އާއި އިންޑިއާ ނޭވީ ގުޅިގެން ހއ އަތޮޅުގައި ޖެނުއަރީ 19 ވަނަ ދުވަހުން ފެށިގެން ފެބްރުއަރީ 28 ގެ ނިޔަލަށް ހައިޑްރޯގްރެފިކް ސަރވޭކުރުމަށް ބޭނުންކުރާ މަނަވަރެއް ކަމަށެވެ. މީގެ ކުރިން ހއ. ބާރަށު ކައުންސިލުންވެސް ވަނީ ހައިޑްރޯގްރެފިކް ސަރވޭގެ ޙަރަކާތްތައް އެ ސަރަޙައްދުގައި ކުރިއަށް ގެންދާކަން ޢާއްމުކޮށް އިޢުލާނުކޮށްފައެވެ.

އެގޮތުން މި ސާވޭގައި ގިރިފަރުތަކުގެ މަޢުލޫމާތު އެއްކުރުމާއި، ރަށްތަކުގެ ކޯސްޓްލައިން ކުރެހުމުގެ އިތުރުން ކަނޑުގެ ދިޔަވަރު ދެނެގަތުމަށް ބެންޗް މާކް ޓައިޑްޕޯލް ހަރުކުރުން ފަދަ މަސައްކަތްތައް ކުރިއަށް ގެންދިއުމަށް ހަމަޖެހިފައި ވާކަމަށް ބާރަށު ކައުންސިލްގެ އިޢުލާނުގައިވެއެވެ. މި ސަރވޭގައި ކުދިއުޅަނދުފަހަރާއި ހެލިކޮޕްޓަރުވެސް ބޭނުންކުރުމަށް ވަނީ ހަމަޖެހިފައެވެ.

2007 ވަނަ އަހަރުން ފެށިގެން އިންޑިއާގެ ނޭޝަނަލް ހައިޑްރޯގްރެފިކް އޮފީހާއި ގުޅިގެން ރާއްޖޭގައި ކުރަމުންދާ ހައިޑްރޮގްރެފިކް ސަރވޭއަކީ ދިވެހިރާއްޖޭގައި ނިޔަމިކަމަށް ބޭނުންކުރަމުން އަންނަ ކަރުދާސް ޗާޓާއި، ޖީޕީއެސް އަދި އެކްޑިސްގައި ބޭނުންކުރެވޭ އިލެކްޓްރޯނިކް ޗާޓުތައް އަޕްޑޭޓްކުރުމާއި، އެންކަރޭޖް އަދި އެޕްރޯޗް ޗާޓް ހެދުމަށްޓަކައި ކުރެވޭ ސަރވޭއެކެވެ.