މަތީ ތައުލީމު ހާސިލްކުރުމަށް ދަރިވަރުން ނަގާފައިވާ ސްޓޫޑެންޓް ލޯނު އަނބުރާދައްކަންޖެހޭ ޖެހޭ މުއްދަތު 20 އަހަރަށް އިތުރުކުރުމަށް ނިންމާފައިވާ ކަމަށް ރައީސް އިބްރާހީމް މުހައްމަދު ޞާލިޙް މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވީ، ސްޓޫޑެންޓް ލޯނު އަނބުރާ ދެއްކުމަށް ގެނައިބަދަލާ އެކު، ކުރީގެ ބޮޑު ރޭޓުގައި ދެއްކި ފައިސާ މިހާރު ލޯނުގެ ޖުމްލަ އަދަދުން އުނިކޮށްފައިވާ ކަމަށެވެ.

ރައީސް މިއަދު ވިދާޅުވީ މަތީ ތަޢުލީމަށް ކިޔަވާ ދަރިވަރުންގެ ކަންބޮޑުވުންތަކެއް އަދިވެސް ހުރިކަމަށާއި ސަރުކާރުން އެކަންތައްތައްވެސް ޙައްލުކޮށްދެއްވާނެ ކަމަށެވެ.

ތައުލީމީ ޖީލެއް ބިނާކުރުމަށް ސަރުކާރުން ބޮޑު އިސްކަމެއްދެއްވާއިރު، ޑިޕްލޮމާއިން ފެށިގެން ޕީއެޗްޑީއާ ހަމައަށް ކިޔެވުމަށް 138 މިލިއަން ރުފިޔާ ސަރުކާރުން ވަނީ ސްޓޫޑެންޓް ލޯނުގެ ގޮތުގައި ކަނޑައަޅާފައެވެ. މިއަހަރުގެ ލޯން ސްކީމަށް ހުޅުވާލާފައިވަނީ ސްޓޫޑަންޓް އެޑްމިނިސްޓްރޭޝަން ފީ 3 އިންސައްތައިން 1 އިންސައްތައަށް ކުޑަކުރުމަށްފަހުއެވެ.

މި ސަރުކާރުން ކުރިއަށްގެންދާ ހިލޭ ޑިގްރީ ޕްރޮގްރާމްގެ އަޕްޑޭޓް ދެއްވަމުން ރައީސް ޞާލިޙް މިއަދު ވިދާޅުވީ އެ ޕްރޮގްރާމްގެ ދަށުން މިހާތަނަށް 16000 އަށް ވުރެ ގިނަ ދަރިވަރުން ކިޔަމުން ގެންދާ ކަމަށެވެ. އަދި އޭގެ ތެރެއިން 6،500 އަށް ވުރެ ގިނަ ދަރިވަރުން ވަނީ ދަސްވެނިވެފައިކަމަށް ރައީސް މިއަދު ވިދާޅުވިއެވެ.

ރިޔާސީ ބަޔާނަކީ ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 84ވަނަ މާއްދާގައިވާ ގޮތުގެމަތިން ރައީސުލްޖުމްހޫރިއްޔާ އިއްވަވަންޖެހޭ ބަޔާނެކެވެ. ޤާނޫނު އަސާސީގެ 84 ވަނަ މާއްދާފައި ބަޔާންކޮށްފައިވަނީ ކޮންމެ އަހަރެއްގެ ރައްޔިތުންގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ޤައުމުގެ ޙާލަތު ބަޔާންކޮށްދީ، ޤައުމުގެ ޙާލަތު އިތުރަށް ރަނގަޅުކުރުމަށްޓަކައި ކުރަންޖެހޭ ކަންކަމަށް ރައީސުލްޖުމްހޫރިއްޔާއަށް ފެނިވަޑައިގަންނަވާ ކަންތައްތަކުގެމައްޗަށް އެކުލެވޭ ރިޔާސީ ބަޔާނެއް ރައްޔިތުންގެ މަޖިލީހަށް އިއްވަވަންވާނެކަމަށެވެ.