އިއްޔެ ރައްޔިތުންގެ މަޖިލީހުގައި ހިނގާދިޔަ ކަންތައްތަކާ ގުޅިގެން، މަޖިލީހުގެ ތަޅުމުން މެމްބަރުން ނެރުމުގައި ސިފައިން ހަރަކާތްތެރިވެފައި ނުވާނެކަމަށް ގައުމީ ދިފާއީ ބާރުން ހާމަކޮށްފިއެވެ.

ރިޔާސީ ބަޔާން އިއްވުމަށް އިއްޔެ މަޖިލީހުގެ ޖަލްސާ ފެށުމާއެކު އިދިކޮޅު ޕީޕީއެމް-ޕީއެންސީގެ މެމްބަރުން ވަނީ ރައީސުލްޖުމްހޫރިއްޔާގެ އިބްރާޙިމް މުހައްމަދު ސާލިހުގެ ވާހަކަފުޅަށް ހުރަސް އެޅުމަށް މަސައްކަތްކޮށްފައެވެ. އެކަމާގުޅިގެން މަޖިލީހުގެ ރައީސް ވަނީ ޖަލްސާއަށް ހުރަސް އަޅަމުންދިޔަ މެމްބަރުންގެ ނަން އިއްވައި މަޖިލީހުގެ ސެކިއުރިޓީ ބޭނުންކުރަށްވައިގެން އެމެންބަރުން މަޖިލީހުގެ ތަޅުމުން ނެރެފައެވެ.

އިއްޔެގެ ޖަލްސާގައި މެންބަރުން ނެރުމުގައި ސިފައިން ޙަރަކާތްތެރިވިކަމަށް ރާއްޖޭގެ ބައެއް ނޫސްތަކުން ރިޕޯޓް ކޮށްފައިވާތީ އެމްއެންޑީއެފުން މިއަދު ބުނެފައިވަނީ، އިއްޔެގެ ޖަލްސާގައި ނަން އިއްވުމުން ޗެމްބަރު ތެރޭން މެމްބަރުން ނެރުމުގައި ގައުމީ ދިފާއީ ބާރުން ހަރަކާތްތެރި ނުވާ ކަމަށެވެ. އަދި އެފަދަ އެހީތެރިކަމަކަށްވެސް މަޖިލީހުން އެދިފައިނުވާކަމަށް އެމްއެންޑީއެފުންވަނީ ބުނެފައެވެ.

"އެކަމުގައި ހަރަކާތްތެރިވީ މަޖިލީހުގެ ސެކިއުރިޓީންނެވެ. އަދި މިކަމުގައި އެހީތެރިކަން ފޯރުކޮށްދިނުމަށް ގައުމީ ދިފާއީ ބާރުގައި އެދިފައި ނުވާ ކަމުގައި ވެސް ދަންނަވަމެވެ." އެމްއެންޑީއެފުން މަޢުލޫމާތުދެއެވެ.

އިއްޔެގެ ހަމަނުޖެހުމާއި ގުޅިގެން އިދިކޮޅު ޕީޕީއެމުން ބުނެފައިވަނީ، ރައްޔިތުންގެ މަޖިލީހުގެ ރައީސް މުޙައްމަދު ނަޝީދާއި، ރައީސް ސާލިހުގެ ޢަމުރަށް ޤާނޫނާއި ޚިލާފު ޢަމަލުތައް ހިންގި ސިފައިންގެ ޢަމަލުތައް އެންމެ ހަރުކަށި އިބާރާތުން ކުށްވެރިކުރާކަމަށެވެ.

ރިޔާސީ ބަޔާނަށް ހުރަސް އެޅުމަކީ 2012 ގައި އެމްޑީޕީން ތައާރަފްކުރި ކަމެކެވެ. އޭގެފަހުން ކޮންމެ ވެރިކަމެއްގައިވެސް މި މަންޒަރުތައް ދަނީ ތަކުރާރުވަމުންނެވެ.