އިއްޔެ ހަވީރު ސިނާމާލެ ބްރިޖް ހައިވޭގައި ސައިކަލަކާއި، ކާރެއް ޖެހި ހިނގި ނުރައްކާތެރި އެކްސިޑެންޓްގައި އަނިޔާވި މީހާއަށް ފަރުވާ ދެމުންދަނީ ވެންޓިލޭޓަރުގައިކަމަށް އައިޖީއެމްއެޗުން ހާމަކޮށްފިއެވެ.

އައިޖީއެމްއެޗުން ބުނީ އެކްސިޑެންޓްގައި އަނިޔާލިބުނު މީހާގެ ހާލު ސްޓޭބަލްނޫން ކަމަށާއި، އެމީހާއަށް މިވަގުތު ފަރުވާ ދެމުންދަނީ އައިސީޔޫގައި ކަމަށެވެ. އަދި އޭނާ އޮތީ ވެންޓިލޭޓަރުގައިކަމަށްވެސް މަޢުލޫމާތުދެއެވެ.

ބުރިޖު ހައިވޭގައި އިއްޔެ ކާރަކާއި ސައިކަލެއް ޖެހި ހިނގި މި އެކްސިޑެންޓުގައި ސައިކަލު ދުއްވި މީހާއަށް ވަރަށް ބޮޑެތި އަނިޔާތަކެއް ވަނީ ލިބިފައެވެ. އޭނާ އެކްސިޑެންޓްވީ ހައިވޭއިން ހުޅުމާލެއާ ވީކޮޅުން އައިސް އެއާޕޯޓަށް ވަންނަން ޔޫ-ޓާނެއް ނެގި ވަގުތު ކާރުލޭނުން ބާރު ސްޕީޑްގައި އައި ކާރެއް ޖެހިގެންކަމަށް މަޢުލޫމާތު ލިބެއެވެ.

މަންޒަރުދުށް މީހަކު ބުނީ، ސައިކަލު ދުއްވި މީހާގެ ގައިގެ އެކިތަންތަނުން ލޭ އަންނަތަން ފެނުންކަމަށާއި ލައިގެންހުރި ގަމީސްވެސް އެކި ތަންތަނުން އިރައިގެންގޮސްފައިވާކަމަށެވެ. އަދި އޭނާގެ ފަޔަށް ބޮޑު ގެއްލުމެއް ލިބިފައިވާކަމަށް ވެސް މަންޒަރުދުށް މީހަކު ކިޔައިދިނެވެ.

އެކްސިޑެންޓްވި ކާރާއި ސައިކަލަށްވެސް ބޮޑެތި ގެއްލުންތަކެއް ލިބިފައިވެއެވެ.