ގެއްލިގެން ހޯދާތާ ހަފްތާއެއް ވީއިރުވެސް ސ. މަރަދޫފޭދޫ ގަސްކަރަ، މުޙައްމަދު އާސިރު އިސްމާޢީލްގެ އިތުރު ޚަބަރެއް ނުވާކަމަށް ފުލުހުން ހާމަކޮށްފިއެވެ.

"ރަސް އޮންލައިނަށް" މަޢުލޫމާތު ދެއްވަމުން ފުލުހުންގެ މީޑިއާ އޮފިޝަލް މިއަދު ވިދާޅުވީ، އާސިރު ހޯދުމުގެ މަސައްކަތް އަދިވެސް ކުރިއަށް ގެންދާ ކަމަށެވެ. ނަމަވެސް އޭނާގެ ޚަބަރެއް ލިބިފައިނުވާކަމަށް މީޑިއާ އޮފިޝަލް ވިދާޅުވިއެވެ.

އާސިރު ގެއްލިގެން ފުލުހުން ޢާއްމުކޮށް އިޢުލާނު ކޮށްފައިވަނީ މިމަހުގެ 6 ވަނަ ދުވަހުއެވެ. އެދުވަހު ފުލުހުން ބުނެފައިވަނީ އާސިރު ދިރިއުޅެނީ މާލޭގައި ކަމަށާއި އެންމެ ފަހުން އޭނާ ފެނިފައިވަނީ ފެބުރުވަރީ 4 ވަނަ ދުވަހުގެރޭ 19:30 ހާއިރުކަމަށެވެ. އަދި އޭރު އޭނާ ލައިގެންހުރީ ނޫކުލައިގެ ޖީންސަކާއި ކަޅުކުލައިގެ ގަމީހެއް ކަމަށް މައުލޫމާތު ލިބިފައިވާ ކަމަށް ވެސް ފުލުހުން ވަނީ ބުނެފައެވެ.

އާސިރުގެ ޢާއިލާއާ ޙަވާލާދީ ރާއްޖޭގެ އޮންލައިން ބައެއް މީޑިއާތަކުން ބުނެފައިވަނީ އާސިރު ގެއްލުނުރޭ އޭނާ ގެއިން ނިކުތީ ހުޅުމާލޭގައި އޭނާ މަސައްކަތްކުރާ ފިހާރައަށް ދިއުމަށް ކަމަށެވެ. އޭގެއިތުރުން އާސިރަކީ ސިކުނޑީގެ ބައްޔަކަށް ފަރުވާކުރާ މީހެއްކަމަށް އާއިލާއިން ބުނެފައިވެއެވެ.

އާސިރު ގެއްލުނުފަހުން ހަފްތާއެއް ވެފައިވާއިރު، ފުލުހުން އެދިފައިވަނީ އޭނާއާއި ގުޅޭ އެއްވެސް މައުލޫމާތެއް ލިބިއްޖެނަމަ ވީއެންމެ އަވަހަކަށް އެމަޢުލޫމާތެއް ފުލުހުންނާއި ޙިއްސާކޮށްދިނުމަށެވެ.