ހަތަރު ރަށެއްގައި ޓިވެޓް ސެންޓަރުތައް އެޅުމުގެ މަސައްކަތް ބާރަށް ކުރިއަށް ދާކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ހަސަން ވިދާޅުވެއްޖެއެވެ.

ރާއްޖޭގެ މީޑިއާއެއްގައި ރޭ ވާހަކަފުޅު ދައްކަވަމުން މިނިސްޓަރ އިބްރާހިމް ޙަސަން ވިދާޅުވީ، މަސައްކަތުގެ ހުނަރާއި ތައުލީމު ހޯދަން ބޭނުންވާ ޒުވާނުންނަށް އާއިލާ އާއެކު ރަށުގައި ތިބެގެން މަސައްކަތެއް ދަސްކޮށް ވިޔަފާރިއެއް ފެށުމުގެ ފުރުސަތު ސަރުކާރުން ފަހިކޮށްދެއްވައިފައިވާކަމަށެވެ. އެގޮތުން އެމަސައްކަތް އިތުރަށް ފުޅާކުރުމަށް ޕަބްލިކް، ޕްރައިވެޓް ޕާޓްނަރޝިޕްގެ ދަށުން އަތޮޅުތެރޭގައި ޓިވެޓް ސެންޓަރުތައް އެޅުމުގެ މަސައްކަތް މިހާރު ފަށާފައިވާ ކަމަށް މިނިސްޓަރ ވިދާޅުވިއެވެ.

މަތީ ތަޢުލީމާ ބެހޭ ވަޒީރު ވިދާޅުވީ ސަރުކާރުގެ އެންމެ އިސް އަމާޒަކީ މަތީ ތަޢުލީމަކީ ޒުވާނުން ގަޔާވެގެން ޙާސިލްކުރާ ޢިލްމަކަށް ހެދުން ކަމަށާއި، އެކަމަށްޓަކައި މަތީ ތަޢުލީމް ފޯރުކޮށްދިނުމުގެ ނިޒާމުގައި ހުރި ބުރަކަން ފިލުވާލައި އެއީ ލުއިފަސޭހަ ކަމަކަށް މި ސަރުކާރުން ބަދަލުކުރަމުންދާ ކަމަށެވެ. އެގޮތުން ރަށްރަށުގައި ކޮލެޖް ޔުނިވަރސިޓީ ތަކުގެ ކެމްޕަސްތައް ޤާއިމުކުރުމާއި މަތީ ތަޢުލީމަށް ފޯރުކޮށްދޭ ލޯނު ސްކީމްތައް މިނިސްޓަރ ފާހަގަ ކުރެއްވިއެވެ.

ހަމައެއާއެކު، ރަށްރަށުގައި ތަރައްގީކުރާ ޖޫނިއާ ކޮލެޖުތަކާއި ޓިވެޓް ސެންޓަރުތަކާއެކު ކޮންމެ ރަށެއްގައި ވެސް ދަނާލެއް އަޅަން ނިންމާފައިވާކަމަށް ރޭގެ ޕްރޮގްރާމްގައި މިނިސްޓަރ ވިދާޅުވިއެވެ.

މަތީ ތަޢުލީމުގެ ނިޒާމް މުޅި ރާއްޖެއަށް ފަތުރާލުމަށް ސަރުކާރުން ގެންގުޅޭ ސިޔާސަތުގެ ދަށުން ހއ. ދިއްދޫގައި އަޅާ ޖޫނިއާ ކޮލެޖު ޚާއްސަކޮށްފައި ވަނީ ފުޑް ޓެކްނޮލޮޖީގެ ދާއިރާއިންނެވެ. ރ. އަލިފުށީގައި އަޅާ ސްޓޭޓް އޮފް ދި އާޓްސް ސެންޓަރަކީ ބޯޓް ބިލްޑިން ދާއިރާއަށް ޚާއްސަ ތަނެކެވެ. އަދި ތުލުސްދޫގައި އަޅާ ޕޮލިޓެކްނިކް ޚާއްސަ ކޮށްފައިވަނީ ވޯޓާ ސްޕޯޓްސް އާއި ފުޑް ޓެކްނޮލޮޖީގެ ދާއިރާއިންކަމަށާއި ނ. ކެނދިކުޅުދޫގެ ޖޫނިއާ ކޮލެޖު ހާއްސަވާނީ ޓޫރިޒަމް އެންޑް ހޮސްޕިޓާލިޓީއަށް ކަމަށް މިނިސްޓަރ ވިދާޅުވިއެވެ.