މަތީ ތަޢުލީމާއި ތަމްރީނު ހޯދުމަށް ލޯނު ދިނުމުގެ އުސޫލު އާންމުކޮށްފިއެވެ.

މަތީ ތަޢުލީމާ ބެހޭ ވުޒާރާއިން އެކުލަވާލާފައިވާ އުސޫލުގައި ބުނެފައިވަނީ، ރާއްޖެއާއި ރާއްޖެއިން ބޭރުން މަތީ ތަޢުލީމު ހާސިލުކުރުމާއި ތަމްރީނު ހޯދަން ބޭނުންވާ ދިވެހީންގެ ތެރެއިން އަލަށް ކިޔަވަން ފަށާ ފަރާތްތަކަށާއި، މިހާރުވެސް ކިޔަވަމުންދާ ފަރާތްތަކަށް ލޯނަށް އެދި ކުރިމަތިލެވޭނެ ކަމަށެވެ.

މި އުސޫލުގެ ދަށުން އަލަށް ކިޔަވަން ފަށާ ފަރާތްތައް ކަމުގައި ބަލަނީ ލޯނު ދިނުމަށް އިޢުލާނު ކުރާ އަހަރުގެ ޖަނަވަރީ މަހުގެ 1 ނުވަތަ އޭގެ ފަހުން ޕްރޮގްރާމެއްގައި ކިޔަވަން ފަށާ ފަރާތްތަކަށެވެ. އަދި މިހާރު ކިޔަވަމުންދާ ފަރާތްތައްކަމުގައި ބަލަނީ ލޯނު ދިނުމަށް އިޢުލާނު ކުރާ އަހަރުގެ ޖަނަވަރީ މަހުގެ 1 ގެ ކުރިން ޕްރޮގްރާމެއްގައި ކިޔަވަން ފަށާފައިވާ ފަރާތްތަކަށެވެ.

މަތީ ތަޢުލީމާބެހޭ ވުޒާރާއިން ބުނެފައިވަނީ، ލޯނަށް އެދޭ ދަރިވަރުންނަކީ ފުލްޓައިމް ދަރިވަރަކަށް ވާންޖެހޭނެ ކަމަށާއި، ޤައުމީ ސަނަދުތަކުގެ ލެވެލް 5 އިން ފެށިގެން ލެވެލް 10 ގެ ނިޔަލަށް ހުރި ޕްރޮގްރާމްތަކުގެ ތެރެއިން ޕްރޮގްރާމެއް ފުރިހަމަކުރާ، ނުވަތަ ޕްރޮފެޝަނަލް / ލައިސަންސް ޕްރޮގްރާމެއް ފުރިހަމަކުރަން ހުށަހަޅާ ފަރާތަކަށް ވާންޖެހޭނެ ކަމަށެވެ.

އޭގެ އިތުރުން ދިވެހިރާއްޖޭގައި ކިޔެވުމަށް ދޫކޮށްފައިވާ ލޯނެއް އެހެން ޤައުމެއްގައި ކިޔެވުމަށް ބަދަލެއް ނުކުރެވޭނެކަމަށްވެސް އުސޫލުގައި ބުނެއެވެ. އެހެން ނަމަވެސް ލޯނު ނަގާ ފަރާތް ކިޔެވުމަށް އިޚްތިޔާރުކޮށްފައިވާ ޕްރޮގްރާމް ހިންގުން ރާއްޖޭގެ މަރުކަޒުން ހުއްޓައިލައި އެ ޕްރޮގްރާމަކީ ދިވެހިރާއްޖޭގެ އެހެން މަރުކަޒެއްގައި ކިޔަވައިނުދޭ ޕްރޮގްރާމެއްކަމަށް ވެއްޖެނަމަ، ނުވަތަ ދިވެހިރާއްޖޭގެ އެހެން މަރުކަޒެއްގައި ކިޔަވައިދޭ ޕްރޮގްރާމެއްކަމަށް ވިޔަސް އެ ފަރާތަށް އެ މަރުކަޒެއްގައި ކިޔަވަން ފުރުޞަތު ނުލިބޭ ހާލަތެއްގައި، އެހެން ޤައުމެއްގައި ކިޔެވުމުގެ ފުރުޞަތު ލިބޭނެ ކަމަށް އުސޫލުގައިވެއެވެ.

ލޯނު ދޫކުރުމުގެ އުސޫލުގައިވާ ގޮތުން ލޯނުގެ ފައިސާ ދޫކުރާނީ، އިންސްޓޯލްމަންޓުގެ ގޮތުގައި ކޮންމެ އަހަރު ދެ އިންސްޓޯލްމަންޓެވެ. އެގޮތުން ފުރަތަމަ އިންސްޓޯލްމަންޓަށްފަހު، ދެން ކޮންމެ ފަހަރަކު ވެސް އިންސްޓޯލްމަންޓް ދޫކުރާނީ ދަރިވަރު ކިޔަވަމުންދާކަން މިނިސްޓްރީއަށް ކަށަވަރު ކުރެވޭ ފަދަ ލިޔުމެއް އެ ދަރިވަރަކު ކިޔަވާ މަރުކަޒު މެދުވެރިކޮށް މިނިސްޓްރީއަށް ފޮނުވުމަށް ފަހުގައެވެ.