މާލޭގެ ގެސްޓްހައުސެއްގައި ހަށިވިއްކަމުން ދަނިކޮށް ހައްޔަރުކުރި ދިވެހި ފިރިހެންމީހާ ކޯޓުން ދޫކޮށްލައިފިއެވެ.

ދިވެހި ފުލުހުންގެ ޚިދުމަތުން އިއްޔެ ބުނެފައިވަނީ، މާލެ ސިޓީގައި ފުލުހުން ހިންގި އޮޕަރޭޝަނެއްގައި ހަށިވިއްކާ ކަމަށް ތުހުމަތު ކުރެޥޭ މައްސަލައެއްގައި ރޯޅި ގެސްޓް ހައުސް ބަލާ ފާސްކޮށް 4 މީހުން ހައްޔަރުކޮށްފައިވާ ކަމަށެވެ.

ހަށިވިއްކުމުގެ މިމައްސަލާގައި ހައްޔަރުކޮށްފައިވަނީ 43 އަހަރުގެ ދިވެހި ފިރިހެނަކާއި، 43 އަހަރުގެ ބިދޭސީ ފިރިހެނަކާއި، 31 އަހަރުގެ ބިދޭސީ އަންހެނެއްގެ އިތުރުން 36 އަހަރުގެ ބިދޭސީ އަންހެނެކެވެ.

މި ހަތަރު މީހުންގެ ތެރެއިން ދިވެހި ފިރިހެން މީހާއާއި ބިދޭސީ އަންހެނަކު ހައްޔަރު ކޮށްފައިވަނީ ޖިންސީ ގުޅުން ހިންގަން ތިއްބާ ކަމަށްވެސް ފުލުހުންގެ މީީީޑިއާ އޮފިޝަލް ވިދާޅުވިއެވެ.

އެމައްސަލައިގެ އެންމެ ފަހުގެ މަޢުލޫމާތު ޙިއްސާ ކުރަށްވަމުން ފުލުހުންގެ މީޑިއާ އޮފިޝަލް މިއަދު ވިދާޅުވީ އެމައްސަލާގައި ހައްޔަރުކުރި ދިވެހި ފިރިހެންމީހާ ކޯޓުން ދޫކޮށްލާފައިވާ ކަމަށެވެ. އޭނާ ދޫކޮށްލީ ޝަރުތުތަކެއް ކުރުމަށްފަހު ކަމަށްވެސް މީޑިއާ އޮފިޝަލް ވިދާޅުވިއެވެ.

“43 އަހަރުގެ ބިދޭސީ ފިރިހެން މީހާ ބަންދުގައި ބެހެއްޓުމަށް 15 ދުވަހުގެ މުހައްދަތު ވަނީ ދީފައި، ބިދޭސީ ދެ އަންހެނުން ބަންދުގައި ބޭތިއްބުމަށް 1 ދުވަހުގެ މުއްދަތު ވަނީ ދީފައި.” ފުލުހުންގެ މަޢުލޫމާތު ދީފައިވެއެވެ.

ފުލުހުން ބުނީ މި މައްސަލަ އެއިދާރާއިން އިތުރަށް ތަޙުޤީޤު ކުރަމުން ގެންދާ ކަމަށެވެ.