ހުޅުމާލޭ ހިޔާ ފްލެޓްތަކުގެ ޤަވާއިދުތަކާއި އުސޫލުތަކާ ޚިލާފުވާ ފަރާތްތަކާމެދު ފިޔަވަޅު އަޅާނެކަމަށް ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ހާމަކޮށްފިއެވެ.

އެޗްޑީސީން ނެރުނު ބަޔާނެއްގައި ބުނެފައިވަނީ، ހުޅުމާލެ ދެވަނަ ފިޔަވަހީގެ ހިޔާ ފުލެޓްތަކަކީ ބޮޑު އާބާދީއެއް ދިރިއުޅެމުން އަންނަ ސަރަހައްދެއް ކަމަށްވާތީ އެ ފުލެޓްތަކުގައި ދިރިއުޅޭ މީހުންގެ ރައްކާތެރިކަމަށާއި ފަސޭހައަށް ގިނަ ގަވާއިދުތަކެއް އެ ކޯޕަރޭޝަނުން އެކުލަވާލާފައިވާ ކަމަށެވެ.

އެގޮތުން އިމާރާތުގެ ސްޓަރަކްޗާއަށް ގެއްލުންވާ ފަދަ މަސައްކަތް ކުރުން މަނާ ކުރެވިފައިވާއިރު، އިމާރާތް ބޭނުން ކުރުމުގައިވެސް އެހެން މީހުންނަށް އުނދަގޫ ނުވާނޭ ގޮތަށް ޢަމަލު ކުރުމަށް އުސޫލުތަކެއް ހެދިފައިވާ ކަމަށް އެ ބަޔާނުގައި ވެއެވެ.

އެޗްޑީސީން ބުނީ، އުސޫލުތަކެއް ހެދިފައިވީ ނަމަވެސް އެކި ފަހަރު މަތިން ހިންގާފައިވާ އިންސްޕެކްޝަންތަކުގައި އުސޫލުތަކާއި ގަވައިދުތަކާ ހިލާފު ގިނަ ކަންތައްތަކެއް ފާހަގަވަމުން އަންނަ ކަމަށެވެ. އެގޮތުން އެޕާޓްމަންޓް ތަކުގައި ވިޔަފާރި ކުރުންފަދަ ކަންތައްތައް ފާހަގަވެފައިވާ ކަމަށް ބަޔާނުގައިވެއެވެ.

އެޗްޑީސީން ބުނީ، މިގޮތަށް ފާހަގަކުރެވިފައިވާ އެޕާޓްމަންޓް ޔުނިޓްތައް ޖޫރިމަނާކޮށް، ފިޔަވަޅު އަޅާފައިވާނެ ކަމަށާއި މިހާރުވެސް އެކަމަށް ހާއްސަ އިންސްޕެކްޝަނެއް ހިޔާ ފުލެޓްތަކުގައި ކުރިއަށް ގެންދިއުމަށް ނިންމާފައިވާ ކަމަށެވެ.

އަދި އެ އިންސްޕެކްޝަނުން ފާހަގަވާ ކަންކަމަށް ބަލާ އެކަށީގެންވާ ފިޔަވަޅުތައް ގަވައިދާއި އުސޫލުތަކުގެ ތެރެއިން އަޅަމުން ގެންދާނެކަމަށް އެޗްޑީސީން ވަނީ ބުނެފައެވެ.