ހުޅުމާލޭ ދެވަނަ ފިޔަވަހިން 17 ބިމެއް ސަރުކާރަށް ވިއްކާފައިވަނީ ފްލެޓް އެޅުމަށް ކަމަށް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން ހާމަކޮށްފިއެވެ.

ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީގެ ބެލުމުގެ ދަށުގައިވާ ހުޅުމާލޭ ދެވަނަ ފިޔަވަހިން 17 ބިމެއް 878.4 މިލިއަން ރުފިޔާއަށް ސަރުކާރުން ގަނެފައިވާއިރު ހުޅުމާލެއިން މާލޭ ރައްޔިތުންނަށް ގޯތި ދިނުމަށް ސަރުކާރުން ދަނީ މަސައްކަތް ކުރަމުންނެވެ.

އެޗްޑީސީން ބުނީ، ސަރުކާރުގެ ފަރާތުން އިޖުތިމާއީ ބޯހިޔާވަހިކަން ފޯރުކޮށްދިނުމަށް ކުރާ މަސައްކަތުގެ ދަށުން 4000 ހައުސިން ޔުނިޓު މަޝްރޫއު ހިންގުމަށް އެޗްޑީސީ އާއި ފިނޭންސް މިނިސްޓްރީ އަދި ފަހި ދިރިއުޅުން ކޯޕަރޭޝަނާ އެކު ވެފައިވާ އެއްބަސްވުމުގެ ދަށުން 17 ބިމެއް ވިއްކާފައިވާ ކަމަށެވެ.

ސިވިލް ކޯޓުން މިދިޔަ އާދިއްތަ ދުވަހު ވަނީ ބިން ގަތުމުގެ މި މުއާމަލާތް ނިންމާ، ބިންތަކުގެ މިލްކުވެރިކަން ސަރުކާރަށް ބަދަލުކޮށްދީފަ އެވެ. އެގޮތުން ފިނޭންސް މިނިސްޓްރީން ގަނެފައިވަނީ 15،000 އަކަފޫޓާއި 66،000 އަކަފޫޓާ ދެމެދު ޖުމްލަ 17 ބިމެކެވެ.

އެޗްޑީސީން މިއަދު ބުނީ އެބިންތަކުގެ ފައިސާ ދައްކާ ޚަލާސްކުރުމުން ބިންތަކުގެ މިލްކުވެރިކަން ފިނޭންސް މިނިސްޓްރީއަށް ބަދަލުކޮށްފައިވާ ކަމަށެވެ. ހުޅުމާލޭ ދެވަނަ ފިޔަވަހި ހިއްކައި އުމްރާނީ ވަސީލަތްތައް ގާއިމްކޮށްފައިވަނީ އެކަމަށް ލޯނު ނަގައިގެން ކަމަށާއި ހުޅުމާލޭގެ ބިން އެކި ބޭނުންތަކަށް ދިނުމަށާއި ވިއްކުމަށް އަބަދު ވެސް އަގު ކަނޑައަޅާފައި ހުންނާނެ ކަމަށް އެޗްޑީސީން ވަނީ ބުނެފައެވެ.

އެޗްޑީސީން ބުނީ މަޝްރޫއުތަކަށް ކަނޑައަޅާފައިވާ ބިމަށް ފައިސާ ދެއްކުމުން ބިމުގެ މިލްކުވެރިކަން ބަދަލުކުރުމަކީ އަބަދުވެސް ކަންކުރާ އުސޫލު ކަމަށެވެ. އަދި ފަހި ދިރިއުޅުން ކުންފުންޏަށް ވިއްކި ބިންތަކަކީ އިޖުތިމާއީ ބޯހިޔާވަހިކަން ފޯރުކޮށްދޭން ކުރިއަށް ގެންދާ މަސައްކަތެއް ކުރަން ވިއްކި ބިންތަކެއް ކަމުން އާންމުންނަށް ވެސް އޭގެ ފައިދާ ކުރާނެހެން އެތަންތަނުގެ އަގު ކަނޑައަޅާފައިވާނީ ލުއިގޮތްތަކަކަށް ކަމަށް އެޗްޑީސީ އިން ބުނެފައިވެއެވެ.

މީގެކުރިންވެސް ސަރުކާރުން ވަނީ އެޗްޑީސީގެ އަތުން ބައެއް ބިން ގަނެފައެވެ.