ފޭސް ދޭއްގައި ރޯދަމަހަށް އަޅާ ވަގުތީ މާރުކޭޓުން 9 ގޮޅި ދިނުމަށް ނިންމާފައިވަނީ ހިޔާގައި އުޅޭ މީހުންނަށް ކަމަށް އެޗްޑީސީން ބުނެފިއެވެ.

ހައުސިން ޑިވެލޮޕްމެންޓް ކޯޕަރޭޝަން އެޗްޑީސީން ބުނީ، ހިޔާ ސަރަހައްދުން ވަގުތީ މާރުކޭޓަށް 18 ގޮޅި ދިނުމަށް ނިންމާފައިވާ ކަމަށާއި، އޭގެ ތެރެއިން 9 ގޮޅި ހާއްސަ ކޮށްފައި ވަނީ ހިޔާ ސަރަހައްދުގައި ދިރިއުޅޭ ފަރާތްތަކަށް ކަމަށެވެ.

އެޗްޑީސީން ބުނީ ބާކީ ނުވަ ގޮޅި ދޫކުރާނީ އާންމުކޮށް އިއުލާނުކޮށް ހުޅުވާލައިގެން ކަމަށެވެ.

ރޯދަ މަހަކީ ގިނަ އަދަދަކަށް މިފަދަ ހިދުމަތްތަކަށް އޮންނަ ޑިމާންޑް ބޮޑުވާ މަހަކަށް ވާތީ އެޗްޑީސީން ވަނީ މާލެ ސިޓީ ކައުންސިލަށްވެސް ފޭސް ދޭކުން ވަގުތީ މާރުކޭޓެއް ހުޅުވުމަށް ބިން ހަމަޖައްސައިދީފައި ކަމަށްވެސް އެޗްޑީސީން ބުނެއެވެ.

މީގެއިތުރުން ވިނަރެސް އިމާރާތުގެ ކޮމާޝަލް ބްލޮކްގައި އެސްޓީއޯގެ ހިދުމަތްތައް ފޯރުކޮށްދިނުމަށް ޔުނިޓެއް ކަނޑައަޅައި މިދިޔަ މަހު ހަވާލުކޮށްފައި ވާކަމަށާއި، އެޗްޑީސީން ހުރިހާ މުއައްސަސާތަކަށްވެސް ދޭން ޖެހޭ އެއްބާރުލުން ދެމުން ގެންދާނެ ކަމަށް އެކުންފުނިން މިއަދުވަނީ ބުނެފައެވެ.