ސައްހަނޫން ޓީޓީ ބޭނުންކޮށްގެން ތިން މިލިއަން ރުފިޔާގެ މުދާ އެތެރެކުރި ޝިފާއުގެ ބަންދަށް 15 ދުވަސް ޖަހައިފިއެވެ.

މިދިޔަ މަހުގެ 28 ވަނަ ދުވަހު ފުލުހުންގެ ޚިދުމަތުން ބުނެފައިވަނީ، ރާއްޖެއިން ބޭރުގެ އެކި ޤައުމުތަކުގެ ކުންފުނިތަކުން ދިވެހިރާއްޖެއަށް މުދާ އެތެރެކޮށް އެ މުދަލުގެ އަގު އަދާކުރުމުގެ ގޮތުން އެފަރާތްތަކަށް ސައްޙަ ނޫން ޓެލެގްރަފިކް ޓްރާންސްފަރ (ޓީ.ޓީ) ފޮނުވައި، މަކަރާއި ހީލަތުން އޮޅުވާލައިގެން މުދާ އެތެރެކޮށް، އެމުދާ ރާއްޖޭގައި ވިއްކާ މަންފާ ހޯދަމުންދާކަމަށް ތުހުމަތުކުރެވޭ މީހަކު ހޯދައި ހައްޔަރު ކޮށްފައިވާ ކަމަށެވެ.

ކްރިމިނަލް ކޯޓުގެ ބަންދު އަމުރުގައި ބުނާގޮތުން މި މައްސަލައިގައި ހައްޔަރުކޮށްފައިވަނީ، މއ. ހަނީސަކްލް، ހުސައިން ޝިފާއު 37 އަހަރެވެ.

އޭނާ ވަނީ ސައްހަ ނޫން ޓީޓީ ދައްކައިގެން ތިން މިލިއަން ރުފިޔާއަށްވުރެ ގިނަ މުދާ ރާއްޖެ އެތެރެކޮށްފައެވެ. ސައްހަ ނޫން ޓީޓީ ދައްކައިގެން އޭނާ ރާއްޖެއަށް އެތެރެކޮށްފައިވަނީ، ތަރުކާރީ އާއި މޭވާކަމަށްވެސް ކޯޓު އަމުރުގައިވެއެވެ.

ކޯޓުގައި ފުލުހުން ބުނެފައިވަނީ ޝިފާއުގެ މައްޗަށް ތުހުމަތުކުރެވޭ އެފަދަ އެހެން މައްސަލަތަކެއްވެސް އެ އިދާރާއިން އަންނަނީ ތަހުގީގުކުރަމުން ކަމަށެވެ.

ކްރިމިނަލް ކޯޓުން އިއްޔެ ވަނީ އޭނާގެ ބަންދަށް 15 ދުވަސް ޖަހައިފައެވެ.