ހުޅުމާލޭ ރަށު މާރުކޭޓުން 23 ގޮޅި ކުއްޔަށް ދޫކުރުމަށް ހައުސިން ޑިވެލޮޕްމަންޓް ކޯޕަރޭޝަން އެޗްޑީސީން ހުޅުވާލައިފިއެވެ.

ހުޅުމާލޭ ފެރީ ޓަރމިނަލް ކައިރީގައި ތަރައްގީކޮށްފައިވާ ރަށު މާރުކޭޓުގެ ގޮޅިތައް ކުއްޔަށް ދޫކުރުމަށް އެޗްޑީސީން ނިންމާފައިވަނީ 02 އަހަރުގެ މުއްދަތަށެވެ. 73.33 އަކަފޫޓްގެ ގޮޅިއެއްގެ ކުއްޔަކީ މަހަކު 3500 ރުފިޔާއެވެ.

އެޗްޑީސީން ކޮށްފައިވާ އިއުލާނުގައި ބުނެފައިވަނީ ރަށުމާރުކޭޓަށް އެދި ހުށަހަޅާ ފޯމު އެޗްޑީސީގެ ވެބްސަޓުން ޑައުންލޯޑުކުރެވޭނެ ކަމަށެވެ. އަދި ގޮޅިތަކަށް އެދޭ ފަރާތްތަކުން މި މަހުގެ 8 ގެ ކުރިން އެކަމަށް އެދި ފޯމު ހުށައެޅުމަށް އެޗްޑީސީން ވަނީ އެދިފައެވެ.

ރަށު މާރުކޭޓުގެ ގޮޅިތައް ދޫކުރާނީ މިހާރު އެމާރުކޭޓުން ގޮޅި ކުއްޔަށް ނަގާފައި ނުވާ، 18 އަހަރު ފުރިފައިވާ ދިވެހީންނަށެވެ. ގޮޅިތައް ހިންގުމަށް ކުއްޔަށް ހިފާނެ ފަރާތެއް ކަނޑައަޅާނީ ބީލަން ހުށަހަޅާ ފަރާތްތަކުގެ ތެރެއިން އެންމެ މަތީ އަގު ހުށަހަޅާ ފަރާތްތަކަށް ކަމަށް ވެސް އެޗްޑީސީން މަޢުލޫމާތު ދެއެވެ.

އެޗްޑީސީން ބުނެފައި ވަނީ ގޮޅިތައް ލިބޭ ފަރާތްތަކުން 7 ދުވަހުގެ ތެރޭގައި ހިދުމަތް ފަށަން ޖެހޭނެ ކަމަށެވެ. އެ މުއްދަތުގެ ތެރޭގައި ހިދުމަތް ނުފަށައިފިނަމަ އެއްވެސް ބަދަލަކާ ނުލައި އެއްބަސްވުން ބާތިލު ކުރާނެއެވެ.