މިނިސްޓްރީ އޮފް ހަޔަރ އެޑިއުކޭޝަންގެ ޚިދުމަތްތައް ދެން ލިބޭނީ ހުޅުމާލޭގައި ހުންނަ އުމަރު ޒާހިރު އޮފީހުން ކަމަށް އެ ވުޒާރާއިން ހާމަކޮށްފިއެވެ.

ހަޔަރ އެޑިއުކޭޝަން މިނިސްޓްރީން ބުނީ މިއަދުން ފެށިގެން މިނިސްޓްރީ އޮފް ހަޔަރ އެޑިއުކޭޝަން ހިނގަމުންދާނީ ހުޅުމާލެ ފޭސް 1 ގައި ހުންނަ އުމަރު ޒާހިރު އޮފީސް އިމާރާތުގެ 5 ވަނަ ފަންގިފިލާގައި ކަމަށެވެ.

އަދި މިބަދަލާއެކު މިނިސްޓްރީގެ ކައުންޓަރުތަކުން ފޯރުކޮށްދޭ ހިދުމަތްތައް ދިނުމަށް ހަމަޖެހިފައިވަނީ އިމާރާތުގެ ގުރައުންޑް ފްލޯރގައި ގާއިމުކޮށްފައިވާ އެ މިނިސްޓްރީގެ ކައުންޓަރުތަކުން ކަމަށްވެސް މިނިސްޓްރީން ބުނެފައިވެއެވެ.

ޖުމްލަ 185 މިލިއަން ރުފިޔާ ހަރަދުކޮށްގެން ހުޅުމާލޭގައި ތަރައްޤީކުރި އުމަރު ޒާހިރު އޮފީސް އިމާރާތަށް ބަދަލުކުރި މިނިސްޓްރީތަކަކީ، ޓްރާންސްޕޯޓް މިނިސްޓްރީ، ހަޔަރ އެޑިއުކޭޝަން މިނިސްޓްރީ އަދި ޖެންޑާ މިނިސްޓްރީއެވެ. އޭގެ އިތުރުން އަލަށް ރާއްޖޭގައި ގާއިމްކުރާ އެމެރިކާ އެމްބަސީ ހުޅުވަން ހަމަޖެހިފައިވަނީ ވެސް އެ އިމާރާތުގައެވެ.

ސަރުކާރުގެ އިދާރާތައް އެއްފުރާޅެއްގެ ދަށަށް ގެނެސް، ހިދުމަތް ހޯދުމުގައި ރައްޔިތުންނަށް ލުއިފަސޭހަ ގޮތްތައް ހޯދައިދިނުމަކީ އިސްކަމެއްދޭ ކަމެއްކަމަށް ރައީސް ޞާލިޙްވަނީ ވިދާޅުވެފައެވެ.