ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ އޯޕަންޑޭ އަންނަ ހުކުރު ދުވަހު ބާއްވަން އެ ކޯޕަރޭޝަނުން ނިންމައިފިއެވެ.

އެޗްޑީސީން ބުނީ މިއީ ހިޔާ ސަރަހައްދަށް ސެކިއުރިޓީ އެސިސްޓެންޓުންނާއި ސަޕޯޓް ސްޓާފުން ނެގުމަށް އަމާޒުކޮށްގެން ބާއްވާ އޯޕަންޑޭއެއް ކަމަށެވެ. އެގޮތުން ޖުމްލަ 136 ވަޒީފާގެ ފުރުސަތު މި އޯޕަންޑޭގައި ލިބިގެންދާނެ ކަމަށް އެޗްޑީސީން މަޢުލޫމާތުދެއެވެ.

މިފަހަރު އެޗްޑީސީއިން ހުޅުވާލާ ވަޒީފާގެ ފުރުސަތުތަކުގެ ތެރޭގައި ހިމެނެނީ 88 ސެކިއުރިޓީ އެސިސްޓަންޓުންނާއި، 48 ސަޕޯޓް ސްޓާފުންނެވެ. މި ދެ މަގާމަށްވެސް މުސާރާއިގެ ގޮތުގައި ކަނޑައަޅާފައި ވަނީ 10،500 ރުފިޔާއެވެ.

އެޗްޑީސީން ބުނީ އަންނަ ހުކުރު ދުވަހު ހަވީރު 4:00 އިން އިރުއޮއްސި 6:00 އަށް ފޭސް 2 ކާމިލް ދީދީ ސްކޫލުގައި ސެކިއުރިޓީ އެސިސްޓެންޓުނާއި ސަޕޯޓް ސްޓާފުންގެ މަގާމުތަކުގެ އިންޓަވިއު ކުރިއަށް ގެންދިއުމަށް ހަމަޖެހިފައިވާ ކަމަށެވެ. އެހެންކަމުން އޯޕަން ޑޭގައި ވަޒީފާގެ ފުރުސަތަށް އެދި ހުށަހަޅަން ބޭނުންވާ ކޮންމެ މީހަކުވެސް އައިޑީކާޑްގެ ކޮޕީ އާއި ތައުލީމީ ސެޓްފިކެޓްތަކުގެ އިތުރުން ސީވީ ހިފައިގެން ދިއުމަށް އެޗްޑީސީން އެދިފައިވެއެވެ.

އެޗްޑީސީން ކުރިއަށް ގެންދާ އޯޕަން ޑޭއަކީ ހުޅުމާލެ ފޭސް 2 ގެ ހިޔާ ސަރަހައްދު ސާފުކޮށް ބޭއްވުމަށާއި އެސަރަޙައްދުގެ ސެކިއުރިޓީ އިތުރަށް ރަނގަޅު ކުރުމުގެ މަޤުސަދުގައި ކުރިއަށްގެންދާ ޙަރަކާތެކެވެ.