މީގެ އަހަރެއް ކުރިން ވަގަށްނެގި ކުރިނބީ ކައުންސިލްގެ ތިޖޫރީ އެރަށު ވަލުން ފެނިއްޖެއެވެ.

ކުރިނބީ ކައުންސިލުގެ ތިޖޫރީ ވަގަށް ނަގައި، އެރަށު ކޯޓުގެ ތިޖޫރީ ފަޅާލައި ވައްކަން ކޮށްފައިވާކަން އެނގިފައިވަނީ މިދިޔަ އަހަރުގެ ޖެނުއަރީ 23 ވަނަ ދުވަހު ހެނދުނު އެ އިދާރާތައް ހުޅުވުމުންނެވެ.

ވަގަށްނެގި ތިޖޫރި މިއަދު ފެނިފައިވަނީ ކުއްޖަކު އޮޅުކޮށްގެން ގެންގުޅު އަސްދޫންޏެއް ގެއްލިގެން ރަށުތެރެ ބަލަމުން ދަނިކޮށް، އެރަށު ކައުންސިލްގެ އިދާރާއާ ޖެހިގެން އޮންނަ ވާގަނޑުގެ ތެރެއިންނެވެ. މިހާރު ތިޖޫރީވަނީ ފުލުހުންނާ ޙަވާލުކޮށްފައެވެ.

ކުރިނބީ ކައުންސިލުން މީގެ ކުރިން ބުނެފައިވަނީ، ކައުންސިލްގެ ރިޖޫރީ ވަގަށް ނަގާފައިވަނީ އޮފީހުގެ ކުޑަ ދޮރެއްގެ ފެންލައިޓެއް ހަލާކުކޮށްލައިގެން އޮފީސްތެރެއަށް ވަދެ، ތިޖޫރީ ހުންނަ ކޮޓަރީގެ ބޮޑުދޮރު ހަލާކުކޮށްލައިގެން ކަމަށެވެ.

"ތިޖޫރީގައި ހުންނާނީ ގާތްގަނޑަކަށް 123 ރުފިޔާ. ދެން އިތުރަށް އައިޑީކާޑު ކަލެކްޓް ކޮށްފައި ރުފިޔާއެއް ހުރެދާނެ. އިތުރަށް ވަގަށް ގެންދިޔަކަމަށް މިހާތަނަށް ފާހަގަކުރެވިފައިވަނީ އައިޑީކާޑު ޔުނިޓްގައި ބޭނުންކުރާ ޑީއެސްއެލްއާރު ކެމެރާއެއް." ކުރިނބީ ކައުންސިލުން މީގެ ކުރިން ހާމަކޮށްފައިވެއެވެ.

ކުރިނބީ ކައުންސިލާއި ކޯޓު އިމާރާތަކީ ސެކިއުރިޓީ ގާޑުން ބައިތިއްބައިގެން ސެކިއުރިޓީ ބަލަހައްޓާ ތަންތަން ނޫންކަމަށްވެސް ކައުންސިލުން އޭރު ބުނެފައިވެއެވެ.