ހުޅުމާލޭގައި ހުންނަ "ޖޫސް ޓައިމް" ކެފޭ ފުނޑާލުމުގައި އަމަލީގޮތުން ބައިވެރިވި ދެވަނަ މީހާވެސް ހައްޔަރުކޮށްފިއެވެ.

ދިވެހި ފުލުހުންގެ ޚިދުމަތުން އިއްޔެ ބުނީ 2023 ފެބްރުއަރީ 17 ވަނަ ދުވަހުގެރޭ "ހުޅުމާލެ ޖޫސް ޓައިމަށް" ބަޔަކު ވަދެ ގެއްލުންދީފައިވާ މައްސަލައާ ގުޅިގެން އިއްޔެ ކޯޓު އަމުރެއްގެ ދަށުން 19 އަހަރުގެ ފިރިހެނަކު ހައްޔަރުކޮށްފައިވާ ކަމަށެވެ. އޭނާގެ ބަންދަށް ކޯޓުން ވަނީ 15 ދުވަސް ދީފައެވެ.

ހަމައެއާއެކު ފުލުހުން މިއަދު ބުނެފައިވަނީ ޖޫސް ޓައިމް ފުނޑާލި މައްސަލާގައި ޢަމަލީގޮތުން ޙަރަކާތްތެރިވިކަމަށް ތުހުމަތު ކުރެވޭ ދެވަނަ މީހާވެސް މިއަދު ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ.

ފުލުހުން ބުނީ އިއްޔެ އާއި މިއަދު ހައްޔަރުކުރި ދެމީހުންނަކީ ޖޫސްޓައިމަށް ގެއްލުން ދިނުމުގައި އަމަލީ ގޮތުން ބައިވެރިވި ކަމަށް ތުހުމަތު ކުރެވޭ ދެމީހުން ކަމަށެވެ.

މިދިޔަ މަހުގެ 24ވަނަ ދުވަހު ފުލުހުން ވަނީ، "ޖޫސް ޓައިމް" އަށް ގެއްލުންދިން، މޫނު ނިވާ ކޮށްގެން ތިބި މީހުން އެ ވަގުތު ދުއްވި ކަމަށް ބެލެވޭ ސައިކަލު ފުލުހުންގެ ބެލުމުގެ ދަށަށް ގެންގޮސްފައެވެ.

ސޯޝަލް މީޑިއާގައި އާއްމުވެފައިވާ ވީޑިއޯތަކުން ފެންނަ ގޮތުގައި ހުޅުމާލޭގައި ހުންނަ "ޖޫސް ޓައިމް" ކެފޭއަށް މޫނު ނިވާ ކޮށްގެން ތިބި ބަޔަކު ވަދެ ވަނީ ބޮޑެތި ގެއްލުންތަކެއް ދީފައެވެ. އަދި އެ ތަނަށް ހަމަލަދޭން މަރުތެޔޮ ފަދަ ތަކެތި ވަނީ ބޭނުންކޮށްފައެވެ. އެތަނަށް ހަމަލާ ދީފައި ވަނީ ހެލްމެޓް އަޅާ މޫނު ނިވާކޮށްގެން ތިބި ދެ ފިރިހެނުންނެވެ.

ފުލުހުން ބުނީ އެމައްސަލަ އިތުރަށް ތަހުގީގު ކުރަމުންދާ ކަމަށެވެ.