ހުޅުމާލޭ ދެވަނަ ފިޔަވަހީގައި މިއަދު ހެނދުނު ހިނގި އެކްސިޑެންޓެއްގައި މީހަކު ނިޔާވެއްޖެއެވެ.

ފުލުހުންގެ މީޑިއާ އޮފިޝަލް ވިދާޅުވީ މި ޙާދިސާ ހިނގާފައިވަނީ މިއަދު ހެނދުނު 9:56 ހާއިރު ހުޅުމާލެ ފޭސް 2 އެމްޕީއެލް ފްލެޓް ކައިރިން ޕިކަޕަކާއި ސައިކަލެއް ޖެހިގެން ކަމަށެވެ.

މި އެކްސިޑެއްޓްގައި އަނިޔާވީ 59 އަހަރުގެ ފިރިހެނަކަށް ކަމަށާއި، އޭނާއަށް ހުޅުމާލޭ ހޮސްޕިޓަލްގައި ފަރުވާ ދެމުން ދަނިކޮށް ނިޔާވެފައިވާކަމަށް މީޑިއާ އޮފިޝަލް ވިދާޅުވިއެވެ.

ރޭވެސް ހުޅުމާލޭ ފޭސް 2 ޖޭއެސްސީ ސައިޓް ކައިރިން 2 ސައިކަލް ޖެހިގެން އެކްސިޑެންޓެއް ވަނީ ހިނގާފައެވެ. ރޭ 1:20 ހާއިރު ހިނގި އެކްސިޑެންޓުގައި 19 އަހަރުގެ ފިރިހެނަކަށާއި 56 އަހަރުގެ ފިރިހެނަކަށް ވަނީ އަނިޔާވެފައެވެ.

އޭގެތެރެއިން 56 އަހަރުގެ މީހާގެ ޙާލު ސީރިއަސް ކަމަށް ފުލުހުން މަޢުލޫމާތުދެއެވެ.

ރޭގެ އެކްސިޑެންޓްގައި އަނިޔާވި ދެމީހުންނަށް މިހާރު ފަރުވާދެމުންދަނީ އޭޑީކޭގައި ކަމަށާއި މި ދެޙާދިސާވެސް ތަޙުޤީޤު ކުރަމުން ދާކަމަށް ފުލުހުން ވަނީ ބުނެފައެވެ.