އެސްޓީއޯއިން އެމްއޭސީއެލަށް ތެޔޮ ފޯރުކޮށްދިނުމުގެ އެއްބަސްވުން އައުކޮށްފިއެވެ.

އެސްޓީއޯގެ ހެޑް އޮފީހުގައި ބޭއްވި ރަސްމިއްޔާތެއްގައި އެސްޓީއޯގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަބްދުﷲ ސައީދެވެ. އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މަހްޖޫބު ޝުޖާއުއެވެ.

މި ރަސްމިއްޔާތުގައި އެސްޓީއޯގެ މެނޭޖިން ޑިރެކްޓަރު ޢަބްދުﷲ ސައީދު ވިދާޅުވީ ރަޝިޔާ-ޔޫކްރެއިން ހަނގުރާމައާ ގުޅިގެން ދުނިޔޭގެ ތެލުގެ ބާޒާރުގައި އަގަށް އައިސްފައިވާ ބަދަލުގެ ސަބަބުން، މިއަދު އާކުރި އެއްބަސްވުމުގައި އެމްއޭސީއެލަށް ތެޔޮ ފޯރުކޮށްދޭ ރޭޓުތަކަށް އެސްޓީއޯއިން ބަދަލު ގެނެސްފައިވާ ކަމަށެވެ. އެގޮތުން ކުރިން އެމްއޭސީއެލަށް ތެޔޮ ފޯރުކޮށްދިން އަގަށްވުރެ މިފަހަރުގެ އަގު ބޮޑުކަން ސަޢީދު ފާހަގަކުރެއްވިއެވެ.

ސަޢީދު ވިދާޅުވީ އެސްޓީއޯއިން ތެޔޮ ގަތުމުން، އެމްއޭސީއެލްގެ ފިއުލް ސްޓޯރޭޖްގެ ކެޕޭސިޓީއާ އެއްވަރަށް އަބަދުވެސް ތެޔޮ ފޯރުކޮށްދެވޭނެ ކަމަށެވެ.

މި ރަސްމިއްޔާތުގައި އެމްއޭސީއެލްގެ މެނޭޖިން ޑިރެކްޓަރު މަހްޖޫބު ޝުޖާއު ވިދާޅުވީ 2018 ވަނަ އަހަރުން ފެށިގެން އެކުންފުނިން ތެޔޮ ގަންނަމުން ދަނީ އެސްޓީއޯއިން ކަމަށެވެ. އެހެންކަމުން ތެލުގެ އަގަށް ބަދަލުތަކެއް އައި ނަމަވެސް، ރަނގަޅު ރޭޓެއްގައި އެސްޓީއޯ އިން ތެޔޮ ފޯރުކޮށްދޭނެކަމަށް އުއްމީދު ކުރައްވާކަމަށް މަހްޖޫބު ވިދާޅުވިއެވެ.

އަލަށް އެކުލަވާލި އެއްބަސްވުމުގެ ދަށުން 2024 ވަނަ އަހަރުގެ މާރިޗް މަހުގެ ނިޔަލަށް އެސްޓީއޯއިން އެމްއޭސީއެލަށް ތެޔޮ ފޯރުކޮށްދޭނެއެވެ. އަދި މި އެއްބަސްވުމުގެ ދަށުން އެމްއޭސީއެލަށް އެއް އަހަރު ތެރޭ 1.5 މިލިއަން ފީފާގެ ޖެޓް ފިއުލް އާއި 88،000 ފީފާގެ ޑީސަލް އެސްޓީއޯ އިން ފޯރުކޮށްދޭނެއެވެ.