ކްރިމިނަލް ކޯޓުގެ ޤާޟީ ހަސަން ސައީދު ފަނޑިޔާރުކަމުގެ މަޤާމުން ރިޓަޔާ ކުރަށްވައިފި އެވެ.

ޖުޑީޝަލް ސާވިސް ކޮމިޝަން (ޖޭއެސްސީ)އިން ބުނީ 21 އަހަރުގެ ދިގު ހިދުމަތަށް ފަހު ޤާޟީ ހަސަން ސައީދު ރިޓަޔާ ކުރައްވާފައި ވަނީ މިއަދު ކަމަށެވެ. ޤާޟީ ހަސަން ސައީދު ޝަރުއީ ދާއިރާއަށް ކޮށްދެއްވާފައިވާ ހިދުމަތް ފާހަގަކޮށް އެކޮމިޝަނުންް ވަނީ ޝުކުރު ދަންނަވާފަ އެވެ.

ފެމެލީ ކޯޓުގެ އިސް ޤާޟީގެ މަޤާމުގައި ހުންނަވަނިކޮށް ޤާޟީ ހަސަން ސައީދު, ކުރިމިނަލް ކޯޓުގެ ޤާޟީ ކަމަށް ބަދަލުކުރީ ސުލޫކީ މައްސަލައެއް ސާބިތުވެ އޭނާގެ މައްޗަށް އެޅި އިދާރީ ފިޔަވަޅެއްގެ ގޮތުންނެވެ.

އޭގެ ފަހުންވެސް ޤާޟީގެ ގިނަ ސުލޫކީ މައްސަލަތަކެއް ޖޭއެސްސީން ބަލާފައިވާއިރު، މީގެ ދެ މަސްކުރިން ސުލޫކީ މައްސަލައަކާ ގުޅިގެން ޤާޟީ ޙަސަން ސަޢީދު ސަސްޕެންޑްވެސް ކޮށްފައިވެއެވެ. އޭނާ ސަސްޕެންޑު ކޮށްފައިވަނީ ފެމިލީ ކޯޓުގެ އިސް ޤާޟީގެ މަގާމުގައި ހުންނެވި އިރު، އެ ކޯޓުގެ ކައިވެނީގެ ރެޖިސްޓްރާއަށް ކޯޓުން ބޭރުގައި ކައިވެނިކޮށްދޭން ލަފައެއް ދީފައިވާ މައްސަލައެއްގަ އެވެ.

އޭގެ އިތުރުން، ކުރިމިނަލް ކޯޓުގެ ޤާޟީއަކަށް އައްޔަންވި ފަހުން އަމަލު ކުރެއްވި ގޮތްތަކާ ގުޅިގެން ވެސް އޭނާގެ މައްސަލަ ބައެއް ފަރާތްތަކުން ޖޭއެސްސީއަށް ހުށަހަޅާފައިވެ އެވެ. އެގޮތުން ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖޭން ބޭރަށް ފުރުމުގެ ހުއްދަ، އެހެން މީހަކު ޖާމިނުކުރުމަށްފަހު ދިނުމުގެ މައްސަލާގައި އޭނާއަށް ފާޑުކިޔުން އަމާޒުވި އެވެ.

ހަމައެއާއެކު ސީލައިފް މައްސަލާގައި ދައުވާ ލިބޭ އަހުމަދު މޫސާ (އަންމަޓީ) ދޫކޮށްލި މައްސަލާގައި ވެސް ފާޑުކިޔުން އަމާޒުވި އެވެ.