މީސްމީޑިއާގައި ވަގު ޑޮލަރު އިޝްތިހާރުކޮށް ވިއްކާ މައްސަލަ، އެމްއެމްއޭއިން ފުލުހުންނަށް ހުށަހަޅައިފިއެވެ.

މީސްމީޑިއާ މެދުވެރިކޮށް ކޮށްފައިވާ އިޝްތިހާރު ތަކުގައި ބުނެފައިވަނީ އެ ޑޮލަރުތަކަކީ ކޮލިޓީ އަދި އަސްލު ޑޮލަރާ އެއްވެސް ތަފާތެއް ނެތް ޑޮލަރުތަކެއް ކަމަށެވެ. އޭގެ އިތުރުން އޭޓީއެމްތަކުންވެސް އެޑޮލަރު ބަލައިގަތުމުގައި މައްސަލައެއް ކުރިމަތި ނުވާނެކަމަށް ބައެއް އިޝްތިހާރުތަކުގައިވެއެވެ.

އެކަމާ ގުޅިގެން އެމްއެމްއޭ އިން ބުނީ ވަގު ޑޮލަރު އިޝްތިހާރުކޮށް ވިއްކާ މައްސަލަ އެ އޮތޯރިޓީގެ ސަމާލުކަމަށް އައިސްފައިވާ ކަމަށެވެ. އަދި އެ މައްސަލަ ބަލައިދިނުމަށް ފުލުހުންނަށް މިހާރު ހުށަހަޅާފައިވާ ކަމަށް ވެސް އެމްއެމްއޭއިން ހާމަކޮށްފައިވެއެވެ.

ރާއްޖޭގައި ފުޅާ ދާއިރާއެއްގައި ވަގު ޑޮލަރުން ވިޔަފާރި ކުރަމުންދިޔަ ބަޔަކު މިދިޔަ އަހަރުގެ ނޮވެމްބަރު މަހު ވެސް ފުލުހުން ވަނީ ހައްޔަރު ކޮށްފައެވެ.

މައުލޫމާތު ލިބިފައިވާ ގޮތުގައި މިފަހަރު ދައުރުވަމުންދާ ޑޮލަރުތަކަކީ އެމެރިކާގެ 100 ނޫޓުގެ ޑޮލަރާއި އެއްގޮތަށް އުތުރު ކޮރެއާގައި އުފައްދާފައިވާ ނޫޓުތަކެކެވެ.