ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން ހޯދަން އިއުލާނުކުރި ފައިހް ނިޒާމްގެ ބަންދަށް ކްރިމިނަލް ކޯޓުން 15 ދުވަސް ޖަހައިފިއެވެ.

މާރާމާރީގެ މައްސަލައެއްގައި ފުލުހުން ފައިހް ހޯދަން އިޢުލާނުކުރުމުން ފިލައިގެން ގިނަ ދުވަސްތަކަކު އުޅުމަށްފަހު، ފައިހް ވަނީ މިދިޔަ މަހުގެ 21 ވަނަ ދުވަހު އަމިއްލައަށް ފުލުހުންގެ އިދާރާއަށް ހާޒިރުވެފައެވެ. އޭނާ އަމިއްލައަށް ފުލުހުންގެ އިދާރާއަށް ހާޒިރުވުމުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ބުނެފައި ވެއެވެ.

ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ދައުވާ ސ. މަރަދޫފޭދޫ / ރަށްދެބައިގެ، އިބްރާހީމް ފައިޙް ނިޡާމު (25އ)ގެ މައްޗަށް ދަޢުލަތުން ވަނީ އުފުލާފައެވެ.

ފައިހްގެ ބަންދުގެ މުއްދަތު އިތުރުކުރުމަށް އިއްޔެ ކްރިމިނަލް ކޯޓަށް ހާޒިރުކޮށް ފުލުހުން ބުނެފައިވަނީ، އޭނާ ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވުމުގެ ފުރުސަތު އޮތް ކަމަށާއި، އޭނާ ފިލުމުގެ އިޙްތިމާލުވެސް އޮތް ކަމަށެވެ. އެހެންކަމުން ފައިޙް ޝަރީއަތް ނިމެންދެން ބަންދުކޮށް ދިނުމަށް ފުލުހުން އެދިފައިވެއެވެ.

ނަމަވެސް ފައިޙްގެ ބަންދަށް އިއްޔެ ކްރިމިނަލް ކޯޓުން އިތުރުކޮށްދިނީ 15 ދުވަހެވެ. ޤާޟީ އިސްމާއީލް ޝަފީއު ވިދާޅުވެފައިވަނީ, ފައިޙްގެ މައްޗަށް ދައުވާ އުފުލާފައިވާއިރު ބަންދަށް ގޮތެއް ކަނޑައެޅުމުގެ ބާރު މައްސަލަ ބައްލަވާ ޤާޟީއަށް ދިނުމަކީ މުހިންމު ކަމެއް ކަމަށެވެ.

ފައިޙް ހޯދަމުން ދިޔައީ ދިވެހި ފުލުހުންގެ ޚިދުމަތުގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން ތަހުގީގު ކުރަމުން ގެންދާ، ގުރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެންނެވެ.

ފައިޙް ފޮރުވައިގެން ގެންގުޅުމުގެ ތުހުމަތުގައި ފުލުހުން މީގެ ކުރިންވަނީ 5 މީހަކު ހައްޔަރު ކޮށްފައެވެ. ނަމަވެސް ކޯޓުން ވަނީ އޭގެ ތެރެއިން ދެ މީހުން ދޫކޮށްލާފައެވެ.