ރ. ފުއްގިރި ކުއްޔަށް ދޫކުރުމުގެ މުޢާމަލާތުގައި ރައީސް ޔާމީންގެ މައްޗަށް އުފުލާފައިވާ ދަޢުވާތަކުގެ ޝަރީއަތުގެ އަޑުއެހުމެއް ކްރިމިނަލް ކޯޓުގައި މިއަދު ކުރިއަށް ގެންގޮސްފިއެވެ.

ރ. ފުއްގިރި ކުއްޔަށް ދޫކުރުމުގެ މުޢާމަލާތާއި ގުޅިގެން ޕްރޮސިކިއުޓާ ޖެނަރަލްގެ ފަރާތުން ކުރީގެ ރައީސް ޔާމީންގެ މައްޗަށް އުފުލާފައިވަނީ މަނީ ލޯންޑަރިން ކުށުގެ ދައުވާ އާއި ރިޝްވަތު ގަބޫލު ކުރެއްވުމުގެ ދައުވާ އެވެ. މި މައްސަލާގައި ކ. މާލެ، މއ. ކުރިކީލަހިޔާ، އަހުމަދު ކްރިކް ރިޟާގެ މައްޗަށާއި، ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމަންޓް ޕްރައިވެޓް ލިމިޓެޑްގެ މައްޗަށްވެސް ދަޢުލަތުން ވަނީ ދަޢުވާ އުފުލާފައެވެ.

ރ. ފުއްގިރި މައްސަލައިގެ އިބްތިދާއީ އަޑުއެހުމުގައި ރައީސް ޔާމީން ވަނީ އެމަނިކުފާނުގެ މައްޗަށް އުފުލާފައިވާ ދަޢުވާތަކަށް އިންކާރު ކުރަށްވާފައެވެ. އަދި ދެފަރާތުންވެސް ވަނީ މައްސަލާގައި ހެކި ހުށައަޅައިފައެވެ. އެގޮތުން މި މައްސަލައިގައި ދައުލަތުން ރައީސް ޔާމިނާއި ދެކޮޅަށް 82 ހެކި ވަނީ ހުށަހަޅާފައެވެ. އަދި ރައިސް ޔާމީންގެ ފަރާތުން ދިފާއުގައި 30 ހެކި ހުށަހެޅިއެވެ.

މިއަދުގެ އަޑުއެހުމުގައި ރައީސް ޔާމީން ވިދާޅުވީ، ފުއްގިރި މައްސަލައިގައި ވަކީލުންނާ މަޝްވަރާ ކުރެއްވުމުގެ އެކަށީގެންވާ ފުރުސަތު ލިބިވަޑައިނުގަންނަވާ ކަަމަށެވެ. އަދި ފުލުހުން އެމަނިކުފާނު ފްރޭމް ކުރުމަށް މަސައްކަތް ކޮށްފައިވާ ކަމަށް ރައީސް ޔާމީން މިއަދު ވިދާޅުވިއެވެ. ރައީސް ޔާމީން ވިދާޅުވީ، ދައުލަތުން ޝަފަހީ ހެކި ހުށައަޅާފައިވަނީ އެމަނިކުފާނުގެ އަބުރު ނަގާލުމުގެ ގޮތުން ކަމަށެވެ. އޭގެ އިތުރުން މައްސަލައިގެ ޝަރީއަތް ލައިވް ކުރުމަށްވެސް ރައީސް ޔާމީން މިއަދު އެދިވަޑައިގެންނެވިއެވެ.

މިއަދުގެ އަޑުއެހުމުގައި ރައީސް ޔާމީނުގެ ވަކީލު ވިދާޅުވީ، އިފްތިތާޙީ ބަޔާން ހުށައެޅުމަށް ދިފާއުން އަދި ތައްޔާރު ނޫންކަމަށެވެ. މި މައްސަލައިގެ ޝަރީއަތުގެ ކުރީގެ ހުށައެޅުންތަކާ ގުޅޭގޮތުން ހައިކޯޓުން ނިންމި ނިންމުން 3 ނުކުތާއަކާއެކު ދިވެހިރާއްޖޭގެ ސުޕްރީމް ކޯޓުގައި މިހާރު އިލްތިމާސް ކޮށްފައިވާ ކަމަށާއި، ސުޕްރީމް ކޯޓުން ގޮތެއް ކަނޑައެޅެންދެން ދަށު ކޯޓުގެ ޝަރީއަތް މަޑުޖައްސާލުމަށް ވަގުތީ އަމުރަކަށްވެސް އެކޯޓުގައި އެދިފައިވާނެ ކަމަށް ވަކީލް ވިދާޅުވިއެވެ. އެހެންކަމުން ކްރިމިނަލް ކޯޓުގައި ކުރިއަށްދާ ޝަރީއަތުގެ އަޑުއެހުންތައް މަޑުޖައްސާލުމަށް ރައީސް ޔާމީންގެ ފަރާތުން ކޯޓުގައި ވަނީ އެދިފައެވެ.

މިއަދު ބޭއްވި އަޑުއެހުމުގައި މައްސަލަ ބައްލަވާ ޤާޟީ އަލީ ނަދީމް ވިދާޅުވީ، ހެކިބަސް ނެގުމުގެ އަޑުއެހުންތައް ލައިވް ނުކުރަށްވާނެ ކަމަށާއި، އެއީ ހެއްކަށް ނުފޫޒު ފޯރުވުމުގެ ފުރުސަތު އިޙްތިމާލު އޮތުމުން ކަމަށެވެ. ނަމަވެސް ހެކިބަސް ނަގާ ނިމުމުން އަޑުއެހުންތައް ލައިވް ކުރައްވާނެކަމަށް ގާޟީ ވިދާޅުވިއެވެ.

އޭގެއިތުރުން ސުޕްރީމް ކޯޓުގައި އިސްތިއުނާފު ކޮށްފައިވާ ނުކުތާތަކާއި ގުޅިގެން ދަށު ކޯޓުގެ ޝަރީއަތް މަޑުޖައްސާލަން ޖެހޭ ފަދަ ސަބަބެއް އޮތްކަމަށް ނުދެކޭކަމަށްވެސް ޤާޟީ ވިދާޅުވިއެވެ. އަދި މި މައްސަލައިގެ އަޑުއެހުމެއް ދެން އޮންނާނީ އޭޕްރީލް މަހުގެ 30 ވަނަ ދުވަހު ކަމަށް ޤާޟީ ވިދާޅުވިއެވެ.

ރ. ފުއްގިރި މައްސަލާގައި ޕީޖީ އޮފީހުން ބުނެފައިވަނީ، މި މައްސަލާގެ ތެރެއިން ކުށުގައި ހިމެނޭ ފައިސާގެ ގޮތުގައި 1،349،885 ޑޮލަރާއި ކުށުގެ އަމަލުން ހޯދި ފައިސާއާ އެއްކޮށްފައިވާ 2،295،250 ޑޮލަރާއި ޖޫރިމަނާގެ ގޮތުގައި 34،689،425 ޑޮލަރު ދައުލަތަށް އަނބުރާ ހޯދުމަށް މަސައްކަތް ކުރާނެ ކަމަށެވެ. އަދި މި މައްސަލާގައި ދަޢުލަތުންވަނީ ރައީސް ޔާމީނަށް ލިބިފައިވާ ޢާމްދަނީއާއި ނުބައްދަލު ފައިސާ އާއި މުދާ ދަޢުލަތަށް ނަގައިދިނުމަށް އެދިފައެވެ.

މިއީ އެމްއެމްޕީއާރުސީގެ ބޮޑު ޚިޔާނާތާ ގުޅުވައިގެން ރައީސް ޔާމީންގެ މައްޗަށް ދައުވާ އުފުލާފައިވާ ތިންވަނަ މައްސަލައެވެ. މީގެކުރިން ގއ. ވޮޑަމުލާ ކުއްޔަށް ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު މަނީލޯންޑަރ ކުރި މައްސަލައެއް ސާބިތުވެ ރައީސް ޔާމީނަށް ވަނީ، 5 އަހަރުގެ ޖަލު ޙުކުމެއް އިއްވާފައެވެ. ނަމަވެސް އެޙުކުމް ސުޕްރީމް ކޯޓުން ބާތިލުކުރިއެވެ.

އޭގެފަހުން ވ. އާރަށް ބޭރު ބަޔަކަށް ވިއްކައިގެން ލިބުނު އެއް މިލިއަން ޑޮލަރު (15.3 މިލިއަން ރުފިޔާ) ރައީސް ޔާމީންގެ ބޭންކު އެކައުންޓަކަށް ޖަމާކޮށްފައިވާ ކަމަށް ބުނާ މައްސަލާގައި ރިޝްވަތާއި މަނީލޯންޑަރ ކުރުމުގެ ކުށް ކޮށްފައިވާކަން ސާބިތުވެ 11 އަހަރުގެ ޖަލު ހުކުމެއް ރައީސް ޔާމީން މިހާރު ގެންދަވަނީ ޖަލުގައި ތަންފީޒު ކުރަށްވަމުންނެވެ.