މަދު އޮފިސަރުންތަކެއްގގެ ޢަމަލާހެދި މުޅި ފުލުހުންގެ މުއައްސަސާ ބަދުނާމް ނުކުރުމަށް ދާޚިލީ ވަޒީރު އިމްރާން ޢަބްދުﷲ އިލްތިމާސް ކުރަށްވައިފިއެވެ.

މިނިސްޓަރ އިމްރާން މިހެން ވިދާޅުވީ ދިވެހި ފުލުހުންގެ 90 ވަނަ އަހަރީ ދުވަހުގެ މުނާސަބަތުގައި ބޭއްވެވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ރޭގެ ރަސްމިއްޔާތުގައި އިމްރާން ވިދާޅުވީ، ފުލުހެއްގެ ނުވަތަ މަދު އޮސަރެއްގެ ފުށުން ދިމާވާ ކަމެއްގެ ސަބަބުން މުޅި ފުލުހުންގެ މުއައްސަސާ ބަދުނާމް ނުކުރުމަށް ރައްޔިތުންނަށް އިލްތިމާސް ކުރަށްވާ ކަމަށެވެ. ހަމައެއާއެކު ކުށްކުރި އެންމެން އަތުލައިނުގަނެވުނަސް ކުށެއް ނުކުރާ މީހަކަށް ފުލުހުންގެ ފަރާތުން އަނިޔާއެއް ލިބުނަ ނުދިނުމަށްވެސް މިނިސްޓަރ އިމްރާންވަނީ އިލްތިމާސް ކުރައްވާފައެވެ.

މިނިސްޓަރ އިމްރާން ރޭ ވިދާޅުވީ، ފުލުހަކަށްވުމީ އަނެކުންނާ ވަރަށް ތަފާތު ވާޖިބުތަކަކާއި, މަސްއޫލިއްޔަތުތަކަކާއި, ޒިންމާތަކެއް އަދާކުރަންޖެހޭ ކަމެއްކަމަށެވެ. އެގޮތުން ފުރިހަމަ ފުލުހަކަށް ވުމަކީ އޭނާގެ ދިރިއުޅުމާއި, އުޅުމާއި ގުޅުންތައް އަދި ބަސްމޮށުންތެރިކަމާއި, މުއާމަލާތްކުރުން މުޅިން އެހެން ލެވެލްއަކަށް ގެންދަންޖެހޭ ޒިންމާއެއްކަންވެސް މިނިސްޓަރ ފާހަގަކުރެއްވިއެވެ.

މިނިސްޓަރ ޢިމްރާން ވިދާޅުވީ ބިންމައްޗަށް ނޭވާލާ އިންސާނިއްޔަތެއް ދިރިއުޅޭ ކޮންމެ މުޖުތަމައުއަކަށް ކަށަވަރުވާންޖެހޭ އެންމެ އަސާސީ ދެ ކަމުންކުރެ އެއް ކަމަކީ އިންސާނާގެ ފުރާނަޔާއި, ހަށިގަނޑާއި މުދަލަށް ލިބިދޭންޖެހޭ ރައްކާތެރިކަމާއި, ސަލާމަތާއި އަމާންކަން ކަށަވަރުވުންކަމަށެވެ. މިއަދުގެ ތަހުޒީބު މުޖުތަމައުތަކުގައި މިޒިންމާ ހަވާލުކުރެވިފައިވަނީ ޔުނީފޯމް އަޅުވާފައިތިބޭ ފުލުހުންނާކަންވެސް މިނިސްޓަރ ފާހަގަކުރެއްވިއެވެ.

މިނިސްޓަރ އިމްރާން ވިދާޅުވީ ފުލުހުންގެ ޚިދުމަތާމެދު ރައްޔިތުންގެ އުއްމީދުތައް ވަރަށް މަތިކަމަށެވެ. ފުލުހުންގެ ޚިދުމަތުގެ ފެންވަރާމެދު ގިނަ ސުވާލުތަކެއް ކުރެވޭއިރު, ފުލުހުންގެ ޚިދުމަތް ކަޑައްތުކޮށްފައިވާ ފުން ވާދީތަކާއި އުސްފަރުބަދަތަކުގެ ތާރީޚާމެދު ހަމަނަޒަރަކުން ވިސްނާލުމަކީ ސަބަބުވެރި އިންސާނުން ކޮންމެހެން ކުރަންވާނެކަމެއްކަން މިނިސްޓަރ ފާހަގަކުރެއްވިއެވެ.

ފުލުހުންގެ ޚިދުމަތުގެ ތާރީޚަށް އަލިއަޅުއްވާލައްވާ މިނިސްޓަރ ވިދާޅުވީ 2003 ވަނަ އަހަރު ރާއްޖޭގައި އުފެދުނު ސިޔާސީ ހަލަބޮލިކަމާއި ޑިމޮކްރަޓިކް ވިސްނުންތަކުގެ ތެރެއިން ފުލުހުންގެ ޚިދުމަތަކީ އިންސާނީ މުޖުތަމައުގެ ކަރާމަތަށް އިސްކަންދެވިގެން ފޯރުކޮށްދޭންޖެހޭ މަދަނީ ޚިދުމަތެއްކަން ރުހުމާއި, ނުރުހުމާއެކުވެސް އޭރުތިއްބެވި އިސްވެރިންނަށް ޤަބޫލުކުރަންޖެހުނު ކަމަށެވެ. 2004 ވަނަ އަހަރު ފުލުހުން މަދަނީ ޚިދުމަތެއްގެ ގޮތުގައި ޤާއިމްކުރެވުނު ނަމަވެސް މިނިސްޓަރ ވިދާޅުވީ 2004 ން 2008 ގެ އިންތިޚާބާ ހަމައަށް ފުލުހުން މަސައްކަތްކުރަން ޖެހުނީ އާދަޔާ ހިލާފް ޤަބޫލުކުރުންތަކެއްގެ ތެރޭގައި ކަމަށެވެ.

އަދި 2008 ގެ ނޮވެންބަރުން 2012 ފެބްރުއަރީއާ ހަމައަށް ފުލުހުން ދަތުރުކުރީ މުޅިން އެހެން ވާދީއެއްގައިކަމަށް ވިދާޅުވިއެވެ. 2012 ފެބްރުއަރީން 2013 ވަނަ އަހަރުގެ ނޮވެންބަރާ ހަމައަށް ފުލުހުން ހުރަސްކުރަންޖެހުނީވެސް މުޅިންތަފާތު ޖަންގައްޔެއްގައި ކަމަށާއި, 2013 ން 2018 އަށް ފުލުހުން ކުރިމަތިލާންޖެހުނީ މުޅިން އާ ވައްތަރެއްގެ ތޫފާނަކާ ކަމަށް މިނިސްޓަރ ވިދާޅުވިއެވެ.

2018 ގެ ނޮވެންބަރާ ހަމައަށް އައިއިރު ފުލުހުންގެ ސަފުތައް ވަނީ ރޫޅި ހާވިޔާވެފައި ކަމަށާއި, ލީޑަރޝިޕްވަނީ ބަލިކަށިވެ ނިކަމެތިވެފައިކަމަށް މިނިސްޓަރ ޢިމްރާން ޢަބްދުالله ވިދާޅުވިއެވެ. މިނިސްޓަރ ވިދާޅުވީ ފުލުހުންގެ ރޭންކުތަކުގެ މެދުގައި އޮތީ ނާމާންކަމާ ބިރުވެރިކަން ފެތުރި ޢާންމުވެފައި ކަމަށެވެ.

"މިހަޤީޤަތްތައް ސާފްވާލެއް ބޮޑުކަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވެރިކަމަށް ވަޑައިގެންނެވީ ފުލުހުންގެ ހައިބަތާ ގަދަރާއި, ކަރާމާތް އަނބުރާ ހޯދައިދުނުމަށް. ފުލުހުންނަށް ރައްޔިތުންގެ އިތުބާރާއި އިހުތިރާމާއި ލޯބި ހޯދައިދިނުމުގެ އެޖެންޑާއަކައިގެން. ބައިބައިވެފައިވާ ސަފުތައް އެއްކޮށް, ބަލިކަށިވެފައިވާ ލީޑަރޝިޕް ވަރުގަދަކޮށް, މާޔޫސްވެ ނާއުއްމީދުވެފައިވާ އެތައް އޮފިސަރުންގެ އުއްމީދުތައް އުޖާލާ ކުރުވައިގެން. މިސަރުކާރުން ފުލުހުންނާއެކު ފެށީ ބިޔަކަނޑު ހުރަސްކޮށް އަމާން ބަނދަރަކަށް ދިއުމަށް. ވޭތުވެދިޔަ ހަތަރު އަހަރާއި ފަސްމަހުގެ ތެރޭގައި ފުލުހުން ގޮވައިގެން ބިޔަކަނޑު ހުރަސްކޮށް އަމާން އައްސޭރީގެ މަލަމަތި ފެންނަ ހިސާބަށް އަޅުގަނޑުމެން ދަތުރުކޮށްފިން." މިނިސްޓަރ ވިދާޅުވިއެވެ.

ރޭގެ ޖަލްސާގައި އިމްރާން ވިދާޅުވީ، ރަށްރަށުގައި އުޅެމުންދާ ފުލުހުން ދިރިއުޅެނީ ޖަލުގައި އުޅެމުންދާ ގައިދީންނަށް ވުރެ ވެސް ނިކަމެތި ހާލަތެއްގައި ކަމަށެވެ. އެގޮތުން އަތޮޅުތެރޭގެ ރަށްރަށުގައި ފުލުހުން މަސައްކަތްކުރަން ޖެހޭ މާހައުލާއި، ފުލުހުންގެ ދިރިއުޅުމުގެ ކަންކަން ހުންނަ ގޮތާއި، ނިދަންޖެހޭ ތަނަށް ބަލައިފިނަމަ، ގައިދީންނަށް ވުރެ ދިރިއުޅުމުގެ ހާލަތު ދަށްކަމަށް ބުނެވިދާނެކަމަށް އިމްރާން ވިދާޅުވިއެވެ.

އިމްރާނު ވިދާޅުވީ ހުރި ދަތިތަކާ އެކު ވެސް ފުލުހުން މަސައްކަތް ކުރަނީ އެ މީހުންގެ ވާޖިބުވީ އެންމެ ފުރިހަމައަށް އަދާކުރުމަށް ކަމަށާއި، މިގޮތުން ރައްޔިތުންނަށް ދޭންޖެހޭ ހިދުމަތްދިނުމުގައި ފުލުހުން ދާނީ ކުރިއަށް ކަމަށެވެ.